Nuk

იხილეთ აფთიაქების ჩამონათვალი

ციტაპრა / CITAPRA

ორალური გამოყენებისთვის

ტაბლეტის ბირთვი: 

• აქტიური ნივთიერება: 10 მგ ესციტალოპრამი, 12.78 მგ ესციტალოპრამის ოქსალატის ეკვივალენტური. 

• აქტიური ნივთიერება: 20 მგ ესციტალოპრამი, 25.55 მგ ესციტალოპრამის ოქსალატის ეკვივალენტური.  

დამხმარე ნივთიერებები: 

კოლოიდური სილიციუმის ანჰიდრიდი, ლაქტოზას მონოჰიდრატი, პოვიდონი, მიკროკრისტალური ცელულოზა, ნატრიუმის კროსკარმელოზა, ტალკი, მაგნიუმის სტეარატი; 

ტაბლეტის გარსი: 

შემოსაგარსი ფხვნილი Opadry Y-1-7000.

ციტაპრა არის:

თეთრი (10 მგ), ორმხრივამოზნექილი, ცილინდრის ფორმის აპკიანი გარსით დაფარული ტაბლეტები; 

თეთრი (20 მგ), ორმხრივამოზნექილი, ცილინდრის ფორმის აპკიანი გარსით დაფარული ტაბლეტები; 

თითოეულ კოლოფში მოთავსებულია 28 (10 მგ), 28 (20 მგ) აპკიანი გარსით დაფარული ტაბლეტი.

1. რა არის ციტაპრა და რისთვის გამოიყენება

ციტაპრა წარმოადგენს ანტიდეპრესანტს, რომელიც მიეკუთვნება სეროტონინის უკუმიტაცების სელექტიური ინჰიბიტორების ჯგუფს. ამ ჯგუფის მედიკამენტები მოქმედებენ თავის ტვინში არსებულ სეროტონინის გამომყოფ სისტემაზე და ზრდიან სეროტონინის დონეს სისხლში. სეროტონინის გამომყოფ სისტემაში არსებული დარღვევები წარმოადგენს დეპრესიის და მსგავსი მდგომარეობების განვითარების მთავარ ფაქტორს.

 

ციტაპრა გამოიყენება შემდეგი დაავადებების სამკურნალოდ:

• დეპრესიული აშლილობა (მძიმე ხარისხის დეპრესიული ეპიზოდების ჩათვლით)

• პანიკური აშლილობა აგორაფობიით ან მის გარეშე (აგორაფობიის სიმპტომებია სახლიდან გასვლის შიში, მაღაზიაში შესვლის შიში, ხალხმრავალ ადგილებში ყოფნის შიში და სხვა)

• სოციალური შფოთვითი აშლილობა (სოციალური ფობია)

• გენერალიზებული შფოთვითი აშლილობა

• ობსესიურ-კომპულსიური აშლილობა

 

თქვენი მდგომარეობის გაუმჯობესებას შესაძლოა დასჭირდეს რამდენიმე კვირა. განაგრძეთ მკურნალობა მანამ, სანამ არ იგრძნობთ მდგომარეობის გაუმჯობესებას.

თუ თავს უკეთ არ გრძნობთ ან თქვენი მდგომარეობა გაუარესდა, მიმართეთ თქვენს ექიმს.

 

2. რისი ცოდნაა საჭირო ციტაპრას მიღებამდე

ნუ მიიღებთ ციტაპრას შემდეგი მდგომარეობების დროს:

• ალერგია (ჰიპერმგრძნობელობა) პრეპარატის შემადგენელი ნებისმიერი კომპონენტის მიმართ 

• მონოამონიოქსიდაზას ინჰიბიტორებთან (მაო-ს ინჰიბიტორები) ერთად, სელეგილინის (გამოიყენება პარკინსონიზმის სამკურნალოდ), მოკლობემიდის (გამოიყენება დეპრესიის სამკურნალოდ) და ლინეზოლიდის (ანტიბიოტიკი) ჩათვლით

• გაქვთ თანდაყოლილი ან წარსულში გქონიათ გულის რიტმის დარღვევა (ვლინდება ელექტროკარდიოგრამაზე)

• ანტიარითმულ ან სხვა პრეპარატებთან ერთად, რომლებსაც გავლენა აქვს გულის რიტმზე

 

გამოიჩინეთ განსაკუთრებული სიფრთხილე და მიმართეთ ექიმს, თუ:

• გაქვთ ეპილეფსია (კრუნჩხვის გამოვლენის ან სიხშირის ზრდის შემთხვევაში, პრეპარატით მკურნალობა უნდა შეწყდეს)

• გაქვთ ღვიძლის ან თირკმლის უკმარისობა (შესაძლოა საჭირო გახდეს პრეპარატის დოზის კორექცია)

• გაქვთ დიაბეტი (პრეპარატმა შესაძლოა გავლენა იქონიოს სისხლში გლუკოზის შემცველობაზე და საჭირო გახდეს ინსულინის ან/და ორალური ჰიპოგლიკემიური პრეპარატების დოზის კორექცია)

• გაქვთ ნატრიუმის შემცირებული რაოდენობა სისხლში

• გაქვთ კალიუმის და მაგნიუმის დაბალი დონე სისხლში

• გაქვთ მიდრეკილება სისხლდენისკენ და სისხლჩაქცევებისკენ

• გიტარდებათ ელექტროშოკური თერაპია

• გაქვთ გულის უკმარისობა

• აღგენიშნებათ გულის მხრივ პრობლემები, უახლოეს წარსულში გქონდათ სტენოკარდიული შეტევა

• აღგენიშნებათ “Qt ინტერვალის გახანგრძლივების სინდრომი“ (შესაძლოა აღნიშნული სინდრომი ჰქონდეს თქვენს ოჯახის წევრებს, რაც ასევე გასათვალისწინებელია მემკვიდერეობითი დატვირთვის არსებობის გამო)

• გაქვთ შენელებული გულისცემა, რომელიც შესაძლოა დაკავშირებული იყოს ორგანიზმიდან მარილების დაკარგვასთან გახანგრძლივებული დიარეის ან ღებინების გამო, ან გამოწვეული იყოს დიურეტიკების მიღებით; 

• გაქვთ არათანაბარი გულისცემა, გონების დაბინდვა, თავბრუსხვევა ფეხზე წამოდგომისას (ორთოსტატული ჰიპოტენზია)

• გაქვთ ან წარსულში გქონდათ გლაუკომა

 

საყურადღებოა, რომ მანიაკალურ-დეპრესიული ფსიქოზის მქონე პაციენტებში შესაძლებელია მანიაკალური ფაზის გააქტიურება, რაც ვლინდება უჩვეულო და სწრაფად ცვალებადი იდეების წარმოშობით, არაადეკვატური სიხარულის შეგრძნებით ან გადაჭარბებული ფიზიკური აქტივობით. მკურნალობის პირველი კვირის განმავლობაში შესაძლებელია ასევე გამოვლინდეს მოუსვენრობა, მათ შორის, ჯდომის და დგომის დროს. 

აღნიშნული სიმპტომების გამოვლენის შემთხვევაში დაუყოვნებლივ მიმართეთ ექიმს. 

 

სუიციდური ფიქრები და დეპრესიის ან შფითვითი აშლილობის გაღრმავება 

თუ გაქვთ დეპრესია ან/და შფოთვითი აშლილობა, შესაძლოა ზოგჯერ გქონდეთ თვითდაზიანების ან თვითმკვლელობის ფიქრები. აღნიშნული მოვლენები შესაძლოა გაძლიერდეს ანტიდეპრესანტების საწყის ეტაპზე მიღებისას. 

ანტიდეპრესანტების მოქმედების გამოვლენას სჭირდება გარკვეული დრო, ჩვეულებრივ – ორი კვირა ან მეტი. კლინიკური კვლევების ჩატარების დროს სიუციდალური მიდრეკილებები მეტად აღინიშნებოდა ფსიქიატრიული ანამნეზის მქონე 25 წელზე ნაკლები ასაკის პაციენტებში, რომლებიც ადრე მკურნალობდნენ ანტიდეპრესანტებით.

 

თუ გაქვთ მსგავსი ფიქრები თვითმკვლელობის ან თვითდაზიანების შესახებ, დაუყოვნებლივ მიმართეთ ექიმს ან გადაუდებელი სამედიცინო დახმარების ცენტრს. შესაძლოა თქვენთვის სასარგებლო იყოს ასევე მეგობრისთვის ან ნათესავისთვის მიმართვა და მათი მხრიდან რჩევა ან დახმარება. გადაეცით მათ პრეპარატის ინსტრუქცია წასაკითხად და სთხოვეთ თქვენი მდგომარეობის შეფასება და დახმარების გაწევა.

 

ბავშვები და მოზარდები

ციტაპრა არ გამოიყენება 18 წლამდე ასაკის ბავშვებსა და მოზარდებში. 

პრეპარატის გამოყენებისას 18 წლამდე ასაკში მომატებულია ისეთი გვერდითი მოვლენების რისკი, როგორიცაა სუიციდური ფიქრები, აგრესიული განწყობა და სხვა. შესაძლოა, პაციენტის ინტერესებიდან გამომდინარე, ექიმმა მაინც საჭიროდ ჩათვალოს პრეპარატის დანიშვნა აღნიშნულ ასაკში. ამ შემთხვევაში დაუსვით ექიმს ნებისმიერი შეკითხვა პრეპარატის და მის მიერ გამოწვეული გვერდითი მოვლენების შესახებ. 

გარდა ამისა, ამჟამად არ არის ესციტალოპრამის ზრდაზე, მომწიფებაზე და კოგნიტიურ და ქცევით განვითარებაზე მოქმედების უსაფრთხოების მონაცემები ამ ჯგუფის პაციენტებში მისი ხანგრძლივი გამოყენებისას.

 

სხვა სამკურნალო საშუალებებთან ურთიერთქმედება

აცნობეთ ექიმს ან ფარმაცევტს, თუ იღებთ ან იღებდით რომელიმე სხვა სამკურნალო საშუალებას ურეცეპტოდ გასაცემი პრეპარატის ჩათვლით.

არ მიიღოთ ციტაპრა, თუ თქვენ იღებთ გულის რიტმის დარღვევის სამკურნალო მედიკამენტებს, როგორიცაა IA და III ანტიარითმიული პრეპარატები, ასევე ანტიფსიქოზურ პრეპარატებს (მაგ., ფენოთიაზინის წარმოებულები, პიმოზიდი, ჰალოპერიდოლი), ტრიციკლურ ანტიდეპრესანტებს, ანტიმიკრობულ პრეპარატებს (მაგ., სპარფლოქსაცინი, მოქსიფლოქსაცინი, ერითრომიცინი ი/ვ, პენტამიდინი, მალარიის სამკურნალო საშუალებები – განსაკუთრებით ჰალოფანტრინი), ანტიჰისტამინურ პრეპარატებს (ასტემიზოლი, მიზოლასტინი). 

 

აცნობეთ ექიმს, თუ თქვენ იღებთ ქვემოჩამოთვლილი პრეპარატებიდან რომელიმეს:

• მაო-ს არასელექტიური ინჰიბიტორების ჯგუფის პრეპარატები, რომლებიც აქტიური ნივთიერებების სახით შეიცავს ფენელზინს, იპრონიაზიდის იზოკარბოქსაზიდს, ნიალამიდს და ტრანილციპრომინს. თუ თქვენ ღებულობდით ჩამოთვლილი ნივთიერებების შემცველი პრეპარატებიდან ერთერთს, ციტაპრას მიღებამდე საჭიროა 14 დღიანი ინტერვლის დაცვა, ხოლო ციტაპრას მიღების შეწყვეტის შემდეგ, საჭიროა 7 დღიანი ინტერვალის დაცვა მათი მიღების გასაგრძელებლად.

• მაო-ს შექცევადი სელექტიური ინჰიბიტორები, რომლებიც შეიცავს მოკლობემიდს (გამოიყენება დეპრესიის სამკურნალოდ)

• მაო-ს შეუქცევადი სელექტიური ინჰიბიტორები, რომლებიც შეიცავს სელეგილინს (გამოიყენება პარკინსონის დაავადების სამკურნალოდ). აღნიშნული პრეპარატები ზრდის გვერდითი მოვლენების განვითარების რისკს.

• ანტიბიოტიკი ლინეზოლიდი

• ლითიუმის (გამოიყენება მანიაკალურ-დეპრესიული ფსიქოზის მკურნალობისას) და ტრიპტოფანის შემცველი პრეპარატები

• სუმატრიპტანი და მსგავსი მედიკამენტები (გამოიყენება შაკიკის სამკურნალოდ), ასევე ტრამადოლი (გამოიყენება ძლიერი ტკივილის დროს). აღნიშნული პრეპარატები ზრდის გვერდითი მოვლენების განვითარების რისკს.

• ციმეტიდინი და ომეპრაზოლი (გამოიყენება კუჭის წყლულის სამკურნალოდ), ფლუვოქსამინი (ანტიდეპრესანტი) და ტიკლოპიდინი (გამოიყენება ინფარქტის რისკის შესამცირებლად). ამ პრეპარატებმა შეიძლება გამოიწვიოს სისხლში ესციტალოპრამის რაოდენობის ზრდა. 

• Hypericum perforatum, ანუ კრაზანა (დეპრესიის სამკურნალო მცენარეული საშუალება)

• აცეტილსალიცილის მჟავა და არასტეროიდული ანთების საწინააღმდეგო პრეპარატები (პრეპარატები, რომლებიც გამოიყენება, როგორც ტკივილგამაყუჩებლები ან სისხლის გამათხიერებლები – ანუ, ანტიკოაგულანტები)

• ვარფარინი, დიპირიდამოლი და ფენპროკოუმონი (ანტიკოაგულანტები). მკურნალი ექიმი სავარაუდოთ შეამოწმებს სისხლის შედედების უნარს როგორც ციტაპრას მიღებამდე, ასევე ციტაპრათი მკურნალობის შეწყვეტის შემდეგ. ამგვარად, დადგინდება თქვენს მიერ მიღებული ანტიკოაგულანტის დოზის ადექვატურობა.

• მეფლოქუინი (გამოიყენება მალარიის სამკურნალოდ), ბუპროპიონი (გამოიყენება დეპრესიის სამკურნალოდ და როგორც თამბაქოზე დამოკიდებულებისგან სამკურნალო პრეპარატი) და ტრამადოლი (გამოიყნებეა ძლიერი ტკივილის დროს). აღნიშნულ პრეპარატებთან გამოყენება ზრდის კრუნჩხვითი მზაობის რისკს.

• ნეიროლეპტიკები (შიზოფრენიის და ფსიქოზების სამკურნალო პრეპარატები), კრუნჩხვითი მზაობის ზრდის რისკის გამო, და ანტიდეპრესანტები.

• ფლეკაინიდი, პროპაფენონი და მეტოპროლოლი (გამოიყენება გულ-სისხლძარღვთა დაავადებების სამკურნალოდ), დეზიპრამინი, კლომიპრამინი და ნოტრიპტილინი (ანტიდეპტრესანტები), რისპერიდონი, თიორიდაზინი და ჰალოპერიდოლი (ანტიფსიქოტური საშუალებები). აღნიშნულ პრეპარატებთან გამოყენებისას საჭიროა ციტაპრას დოზის კორექცია.

• პრეპარატები, რომლებიც იწვევს “Qთ ინტერვალის გახანგრძლივების სინდრომს“ ან ამცირებს კალიუმის და მაგნიუმის დონეს სისხლში.

 

ციტაპრას მიღება საკვებთან და სითხეებთან ერთად

პრეპარატის მიღება შესაძლებელია საკვებთან ერთად ან მის გარეშე. სხვა სამკურნალო საშუალებების მსგავსად, ციტაპრას შემთხვევაშიც არ არის რეკომენდებული მიღება ალკოჰოლთან ერთად, თუმცა ალკოჰოლის და ესციტალოპრამის ურთიერთქმედება ნაკლებ სავარაუდოა.

 

ორსულობა, ლაქტაციის პერიოდი და ფერტილობა

ორსულობა

თუ ხართ ორსულად ან გეგმავთ ორსულობას, პრეპარატის მიღებამდე კონსულტაციისთვის მიმართეთ თქვენს მკურნალ ექიმს.

ციტაპრას გამოყენება ორსულობის დროს დაუშვებელია. 

თუ ორსულობის პერიოდში მაინც მოხდა პრეპარატის გამოყენება, მისი მიღების უეცარი შეწყვეტა არ შეიძლება. პრეპარატის მიღება ორსულობის დროს, განსაკუთრებით – ბოლო ტრიმესტრში, აზიანებს ნაყოფს, კერძოდ – ზრდის ახალშობილთა პერსისტენტული პულმონარული ჰიპერტენზიის განვითარების რისკს, რაც შემდგომში გამოიხატება ახალშობილის გახშირებული სუნთქვით და ციანოზით (კანის მოლურჯო ფერით). ახალშობილს ასევე შეიძლება გამოუვლინდეს კრუნჩხვები, სხეულის ტემპერატურის ცვალებადობა, კვებითი სირთულეები, ღებინება, სისხლში გლუკოზის დონის შემცირება, კუნთების რიგიდულობა ან მოდუნება, რეფლექსების გაძლირება, ტრემორი, გაღიზიანებადობა, ძილის დარღვევა, გამუდმებული ტირილი და სხვა პათოლოგიური მოვლენები. აღნიშნული სიმპტომები ვლინდება დაბადებიდან 24 სთ-ის განმავლობაში. 

სიმპტომების გამოვლენისას დაუყოვნებლივ მიმართეთ მეანს ან/და ექიმს.

 

ლაქტაცია

სავარაუდოთ, ესციტალოპრამი გამოიყოფა დედის რძით, ამიტომ პრეპარატის მიღება ლაქტაციის პერიოდში დაუშვებელია. 

თუ ლაქტაციის პერიოდში პრეპარატის მიღება აუცილებელია, საჭიროა ძუძუთი კვების შეწყვეტა.

 

ფერტილობა

ცხოველებზე ჩატარებულ კვლევებში ნაჩვენებია სპერმის ხარისხის დაქვეითება, რამაც შესაძლოა უარყოფითი გავლენა იქონიოს განაყოფიერებაზე, თუმცა ადამიანებში ეს ზემოქმედება დადგენილი არ არის.

 

ავტომობილისა და სხვა მექანიზმების მართვის უნარი

ციტაპრას გამოყენებამ ექიმის მიერ დანიშნული დოზირებითაც კი შესაძლოა მნიშვნელოვანი გავლენა იქონიოს ისეთი ქმედებების განხორციელებაზე, რაც მოითხოვს ყურადღების კონცენტრირებას და სწრაფ ფსიქო-მოტორულ რეაქციებს. მკურნალობის პერიოდში რეკომენდებულია თავის შეკავება ავტომობილის და სხვა მექანიზმების მართვისაგან.

 

მნიშვნელოვანი ინფორმაცია ციტაპრას შემადგენელი ზოგიერთი დამხმარე ნივთიერების შესახებ

პრეპარატი შეიცავს ლაქტოზას. თუ თქვენ გაქვთ ზოგიერთი ტიპის შაქრის აუტანლობა, პრეპარატის მიღებამდე გაიარეთ კონსულტაცია ექიმთან.

 

3. ციტაპრას მიღების წესი

ციტაპრა მიიღეთ მხოლოდ ექიმის დანიშნულებით, მკურნალობის კურსის შესაბამისად. 

 

ზრდასრულები

დეპრესიის მკურნალობა

ციტაპრას რეკომენდებული დღიური დოზა შეადგენს 10 მგ ერთხელ დღეში. ექიმის გადაწყვეტილებით შესაძლებელია პრეპარატის დოზის გაზრდა მაქსიმუმ 20 მგ/დღეში. 

აგორაფობიით ან მის გარეშე მიმდინარე პანიკური აშლილობის მკურნალობა 

პირველი კვირის განმავლობაში მკურნალობის საწყისი დოზა შეადგენს 5 მგ/დღეში, ხოლო მეორე კვირიდან ხდება დოზის გაზრდა – 10 მგ/დღეში. ექიმის გადაწყვეტილებით შესაძლებელია პრეპარატის დოზის შემდგომი ზრდა მაქსიმალურ დღიურ დოზამდე – 20 მგ/დღეში.

სოციალური შფოთვითი აშლილობის (სოციალური ფობია) მურნალობა

რეკომენდებული დოზა შეადგენს 10 მგ დღეში ერთხელ. აღნიშნულ დოზაზე პაციენტის საპასუხო რეაქციიდან გამომდინარე ექიმმა შესაძლოა ან შეამციროს დოზა – 5 მგ-მდე/დღეში, ან გაზარდოს იგი – 20 მგ-მდე/დღეში.

გენერალიზებული შფოთვითი აშლილობის მკურნალობა

ჩვეულებრივ რეკომედებული დოზა შეადგენს 10 მგ დღეში ერთხელ. შესაძლოა მკურნალმა ექიმმა გაზარდოს დოზა – 20 მგ-მდე/დღეში.

ობსესიურ-კომპულსიური აშლილობის მკურნალობა

ჩვეულებრივ რეკომედებული დოზა შეადგენს 10 მგ დღეში ერთხელ. შესაძლოა მკურნალმა ექიმმა გაზარდოს დოზა – 20 მგ-მდე/დღეში.

ხანგრძლივი მკურნალობის შემთხვევაში საჭიროა რისკ-სარგებლიანობის გადაფასება რეგულარულად.

 

პრეპარატის გამოყენება განსაკუთრებული პოპულაციის პაციენტებში

ხანდაზმული პაციენტები (65 წელზე მეტი ასაკის პაციენტები)

რეკომენდებული საწყისი დოზა შეადგენს – 5 მგ დღეში ერთხელ. ექიმმა შესაძლოა გაზარდოს დოზა 10 მგ-მდე/დღეში. ესციტალოპრამის ეფექტურობა სოციალური შფოთვითი აშლილობის დროს ხანდაზმულ პაციენტებში შესწავლილი არ არის.

 

ღვიძლის ფუნქციის დარღვევის მქონე პაციენტები

რეკომენდებული საწყისი დოზა ღვიძლის ფუნქციის დარღვევის მქონე პაციენტებში მკურნალობის დაწყებიდან პირველი 14 დღის განმავლობაში არ უნდა აღემატებოდეს 5 მგ-ს დღეში. შემდეგში, მკურანლობაზე პასუხიდან გამომდინარე, ექიმმა შესაძლოა გაზარდოს დოზა 10 მგ-მდე დღეში. განსაკუთრებული სიფრთხილეა საჭირო ღვიძლის მძიმე დაზიანების მქონე პაციენტებში.

 

თირკმლის უკმარისობის მქონე პაციენტები

თირკმლის მსუბუქი და საშუალო ხარისხის უკმარისობის მქონე პაციენტებში დოზის კორექცია საჭირო არ არის. განსაკუთრებული სიფრთხილეა საჭირო პრეპარატის გამოყენებისას თირკმლის მძიმე უკმარისობის მქონე პაციენტებში.

 

გამოყენება ბავშვებსა და 18 წლამდე ასაკის მოზარდებში

ბავშვებსა და 18 წლამდე ასაკის მოზარდებში ესციტალოპრამი არ გამოიყენება.

 

ციტაპრას (10 და 20 მგ აპკიანი გარსით დაფარული ტაბლეტები) მიღების წესი და მკურნალობის ხანგრძლივობა:

მიიღეთ 1 ტაბლეტი დღეში ერთხელ, ექიმის დანიშნულების მიხედვით. პრეპარატი მიიღეთ მთლიანად, საკმარისი რაოდენობის წყალთან ერთად (წლით სავსე 1 ჭიქა). პრეპარატი მიიღება საკვებთან ერთად ან მის გარეშე. საჭიროების შემთხვევაში შესაძლებელია ტაბლეტის გაყოფა ორ ნაწილად.

დაავადების სიმპტომების შემცირება ხდება მკურნალობის დაწყებიდან რამდენიმე კვირის შემდეგ. 

მდგომარეობის გაუმჯობესების შემდეგ პრეპარატის მიღება განაგრძეთ ექიმის რეკომენდაციის მიხედვით. 

არ შეცვალოთ პრეპარატის დოზირება თვითნებურად, ექიმის ინფორმირების გარეშე. პრეპარატით მკურნალობის ნაადრევმა შეწყვეტამ შესაძლოა გამოიწვიოს დაავადების სიმპტომების თავიდან წარმოშობა. რეკომენდებულია მკურნალობის გაგრძელება სულ მცირე 6 თვის განმავლობაში მას შემდეგ, რაც თავს უკეთ იგრძნობთ.

 

საჭირო დოზაზე მეტი ციტაპრას მიღების შემთხვევაში

საჭირო დოზაზე მეტი ციტაპრას მიღების შემთხვევაში, ან როდესაც თქვენი პრეპარატი შეცდომით იქნა მიღებული სხვის მიერ, დაუყოვნებლივ მიმართეთ ექიმს ან უახლოეს გადაუდებელი სამედიცინო დახმარების ცენტრს. მიმართეთ ექიმს იმ შემთხვევაშიც კი, თუ თავს კარგად გრძნობთ. 

დოზის გადაჭარბების სიმპტომებია თავბრუსხვევა, კანკალი, მოუსვენრობა, ძილიანობა, გონების დაკარგვა, გულის რითმის შეცვლა, კრუნჩხვები, სუნთქვის უკმარისობა, კუნთების სისუსტე ან მტკივნეულობა, სხეულის ტემპერატურის მომატება (რაბდომიოლიზის ნიშნები), წყალ-ელექტროლიტური ბალანსის ცვლილება ორგანიზმში, ღებინება, ზოგადი სისუსტე.

 

ციტაპრას დოზის გამოტოვების შემთხვევაში

დოზის გამოტოვების შემთხვევაში, პრეპარატი მიიღეთ როგორც კი გაგახსენდებათ, თუ მალევე არ გიწევთ შემდეგი დოზის მიღება. 

შემდგომი დოზა მიიღეთ ჩვეულებრივ დროს.

ნუ მიიღებთ პრეპარატის გაორმაგებულ დოზას გამოტოვებული დოზის შესავსებად.

 

ციტაპრას მიღების შეწყვეტის შემთხვევაში

თუ გსურთ პრეპარატის მიღების შეწყვეტა, აუცილებელია ექიმის წინასწარი ინფორმირება. თვითნებურად პრეპარატის მიღების შეწყვეტა დაუშვებელია. ექიმმა შესაძლებელია მიგითითოდ პრეპარატის დოზის თანდათანობით შემცირებაზე (რამდენიმე კვირის ან რამდენიმე თვის განმავლობაში). ამგვარად შესაძლებელი იქნება პრეპარატის უეცარი შეწყვეტით გამოწვეული ეფექტებისგან თავის არიდება. აღნიშნული ეფექტების გამოვლენის რისკი მით უფრო მაღალია, რაც მეტად ხანგრძლივი იყო მკურნალობა, მაღალი იყო გამოყენებული სამკურნალო დოზა და პრეპარატის მიღების შეწყევტა მოხდა უეცრად. უმეტეს შემთხვევაში ეს ეფექტები მსუბუქი ხასიათისაა და თავისთავად ქრება დაახლოებით 2 კვირის განმავლობაში, თუმცა ზოგ შემთხვევაში სიმპტომები საკმაოდ ინტენსიურადაა გამოხატული და გრძელდება 2-3 თვის განმავლობაში ან უფრო ხანგრძლივად. იმ შემთხვევაში, თუ პრეპარატის შეწყევტის შემდგომი ეფექტები ძლიერად არის გამოხატული, ექიმმა შესაძლოა გირჩიოთ ტაბლეტების მიღების თავიდან დაწყება და შემდეგ მკურნალობის თანთადანობითი შეწყვეტა.

პრეპარატის უეცარი შეწყვეტის სიმპტომები მოიცავს თავბრუსხვევას, კანზე ჩხვლეტის და წვის შეგრძნებას, ძილის დარღვევებს (ღამის კოშმარები, ჩაძინების გაძნელება), შფოთვა, თავის ტკივილი, გულისრევა, ღებინება, ოფლიანობა, მოუსვენრობა, აგზნება, კანკალი, დეზორიენტაცია, ემოციური ლაბილობა, დიარეა, მხედველობის დარღვევები, გაძლიერებული გულისცემის შეგრძნება (პალპიტაცია). 

აღნიშნული სიმპტომების გამოვლენის შემთხვევაში დაუყოვნებლივ მიმართეთ ექიმს.

4. შესაძლო გვერდითი მოვლენები

ყველა სხვა სამკურნალო საშუალებების მსგავსად ციტაპრას მიღებამ, ზოგიერთი პაციენტის შემთხვევაში, შეიძლება გამოიწვიოს გვერ¬დითი მოვლენები. 

განსაკუთრებულად ხშირად გვერდითი მოვლენები აღინიშნება მკურნალობის პირველი კვირის განმავლობაში, ხოლო შემდგომში, მკურნალობის კურსის გაგრძელებისას, ჩვეულებრივ იკლებს.

 

თუ გამოვლინდა ნებისმიერი ქვემოთ ჩამოთვლილი გვერდითი მოვლენა, დაუყოვნებლივ მიმართეთ მკურნალ ექიმს ან გადაუდებელი სამედიცინო დახმარების ცენტრს:

 

არახშირი (1 შემთხვევაზე მეტი ყოველ 1000 პაციენტში და 1 შემთხვევაზე ნაკლები ყოველ 100 პაციენტში)

• უჩვეულო სისხლდენა, გასტროინტესტინალური სისხლდენის ჩათვლით

• გულის წასვლა (სინკოპე)

იშვიათი (1 შემთხვევაზე მეტი ყოველ 10000 პაციენტში და 1 შემთხვევაზე ნაკლები ყოველ 1000 პაციენტში)

• სახის, ტუჩების, პირის ღრუს და ყელის შეშუპება, რამაც შეიძლება გამოიწვიოს ყლაპვის ან სუნთქვის გაძნელება. (დაუყოვნებლივ მიმართეთ ექიმს ან გადაუდებელი სამედიცინო დახმარების ცენტრს)

• ცხელება, აგზნებადობა, შეუძლოდ ყოფნა, კანკალი, კუნთების უნებლიე შეკუმშვა (სეროტონინის სინდრომი)

სიხშირე უცნობია (არსებული მონაცემების მიხედვით სიხშირის დადგენა შეუძლებელია)

• შარდვის გაძნელება

• კრუნჩხვები

• კანის ან/და თვალის სკლერების სიყვითლე, რაც მიუთითებს ღვიძლის დაზინებაზე (ჰეპატიტი)

• აჩქარებული, არარეგულარული გულისცემა, გულისწასვლა, რაც შესაძლოა მიუთითებდეს სისცოცხლისთვის საშიშ მდგომარეობაზე, როგორიცაა “პირუეტის ტიპის” პარკუჭოვანი ტაქიკარდია

• აზრები საკუთარი თავისათვის ზიანის მიყენების, ან თვითმკვლელობის შესახებ

• მომატებული სისხლცაქცევების ნიშნები, მაგ., სილურჯე (დაჟეჟილობები)

• კანის და ლორწოვანი გარსის უეცარი შეშუპება (ანგიონევროზული შეშუპება)

 

პრეპარატის მიღებისას შეიძლება აღინიშნოს ასევე შემდეგი გვერდითი მოვლენები:

ძალიან ხშირი (1 შემთხვევაზე მეტი ყოველ 10 პაციენტში)

• გულისრევა

• თავის ტკვილი

ხშირი (1 შემთხვევაზე მეტი ყოველ 100 პაციენტში და 1 შემთხვევაზე ნაკლები ყოველ 10 პაციენტში)

• გენერალიზებული შიში, მოუსვენრობა, ფსიქიური აშლილობა, ძილის დარღვევები, თავბრუსხვევა, კანზე უჩვეულო შეგრძნებები (ჩხვლეტის, წვის, ქავილის, შეხების), კანკალი, მთქნარება

• სექსუალური დარღვევები (გახანგრძლივებული ეაკულაცია, ერექციის სისუსტე, დაქვეითებული ლიბიდო)

• დიარეა, შეკრულობა, ღებინება, სიმშრალე პირის ღრუში

• რინიტი, ცხვირის გაჭედვა

• ოფლიანობა

• დაღლილობა, ცხელება

• კუნთების და სახსრების ტკივილი

• წონის მომატება

• მადის გაძლერება ან დაქვეითება

არახშირი (1 შემთხვევაზე მეტი ყოველ 1000 პაციენტში და 1 შემთხვევაზე ნაკლები ყოველ 100 პაციენტში)

• კბილების უნებლიე კრაჭუნი, აგზნებადობა, ნევროზულობა, პანიკური აშლილობა 

• გემოს დარღვევბი, ძილის დარღვევები, გონების დაბინდვა

• ცხვირიდან სისხლდენა

• სისხლდენა ურეთრიდან, რომელიც არ უკავშირდება მენსტრუაციას, ჭარბი რაოდენობის და გახანგრძლივებული მენსტრუალური სისხლდენა

• ჭინჭრის ციება, გამონაყარი კანზე, ქავილი

• თმის ცვენა

• ხელების და ფეხების შეშუპება

• თვალის გუგების გაფართოება, დაბინდული მხედველობა, შუილი ყურებში

• გახშირებული გულისცემა

• წონის დაკლება

იშვიათი (1 შემთხვევაზე მეტი ყოველ 10000 პაციენტში და 1 შემთხვევაზე ნაკლები ყოველ 1000 პაციენტში)

• აგრესიულობა, დეპერსონალიზაცია, ჰალუცინაციები

• გულისცემის შენელება

სიხშირე უცნობია (არსებული მონაცემების მიხედვით სიხშირის დადგენა შეუძლებელია)

• სუიციდური ფიქრები

• მანიაკალური მიდრეკილებები

• მოძრაობის დარღვევა (კუნთების უნებლიე მოძრაობა)

• ლაქტაცია ქალებში, რომლებიც არ კვებავენ ძუძუთი

• ლაქტაციის პერიოდში რძის რაოდენობის შემცირება

• მტკივნეული ერექცია

• სისხლდენები, სისხლჩაქცევები კანზე და ლორწოვანზე, სისხლში თრომბოციტების დაბალი შემცველობა

• თავბრუსხვევა სწრაფად წამოდგომისას (ორთოსტატული ჰიპოტენზია)

• ნატრიუმის დაბალი შემცველობა სისხლში (გამოიხატება ზოგადი და კუნთოვანი სისუსტით)

• შარდის გამოყოფა დიდი რაოდენობით

• ღვიძლის ფერმენტების აქტივობის მატება სისხლში

• კანის და ლორწოვანის უეცარი შეშუპება (ანგიოედემა)

• თვითდაზიანების მცდელობები

• უმოძრაოდ ყოფნის შეუძლებლობა, მოუსვენრობა

• ანორექსია

• ძვლების მოტეხილობის რისკის ზრდა

• გულის რიტმის ცვლილებები (ელექტროკარდიოგრამაზე Qt-ინტერვალის განხანგრძლივება)

 

თუ აგეღნიშნებათ გვერდითი მოვლენები, მათ შორის ისეთი, რაც არ არის აღწერილი მოცემულ ინსტრუქციაში, მიმართეთ ექიმს.

 

5. ციტაპრას შენახვის პირობები

ციტაპრა ინახება ბავშვებისთვის ხელმიუწვდომელ ადგილას, ორიგინალ შეფუთვაში.

ინახება არა უმეტეს 25˚C ტემპერატურაზე.

 

გაცემის წესი:
ფარმაცევტული პროდუქტის ჯგუფი II, გაიცემა ფორმა #3 რეცეპტით.

 

გამოყენება ვარგისობის ვადის გათვალისწინებით:

ნუ გამოიყენებთ ციტაპრას კოლოფზე მითითებული ვარგისობის ვადის გასვლის შემდეგ. 

არ გამოიყენოთ ციტაპრა, თუ შეამჩნიეთ, რომ პრეპარატი ან მისი შეფუთვა დაზიანებულია.

სად შევიძინოთ?