ფარმაცევტული სააგენტოს თანამშრომლებს პოლონური მხარე გადაამზადებს
ფარმაცევტული სააგენტოს თანამშრომლებს პოლონური მხარე გადაამზადებს
თარიღი: 28/10/2021
საქართველოში ფარმაცევტული ინსპექტირების ევროპულ სტანდარტებთან ჰარმონიზების მიზნით რეგულირების სააგენტოს თანამშრომლებს პოლონური მხარე გადაამზადებს
ქვეყანაში ფარმაცევტული ინსპექტირების ევროპულ სტანდარტებთან ჰარმონიზების მიზნით „პოლონეთის მთავარ ფარმაცევტულ ინსპექტორატსა“ და საქართველოს „სამედიცინო და ფარმაცევტული საქმიანობის რეგულირების სააგენტოს“ შორის აქტიური თანამშრომლობა მიმდინარეობს.
პროექტის მიზანი ქართველი სპეციალისტებისთვის, ფარმაცევტულ სფეროში, ევროპული კანონმდებლობისა და ინსპექტირების სტანდარტების შესახებ ცოდნის გაზიარებაა. ამასთანავე, მოხდება რეგულირების სააგენტოს თანამშრომლების აღჭურვა იმ ინსტრუმენტებით, რაც აუცილებელია სამკურნალო საშუალებების მწარმოებლების, იმპორტიორებისა და დისტრიბუტორების პროფესიული ინსპექტირების ჩატარების მიზნით.
ტრენინგის დაწყებამდე, პოლონელ კოლეგას რეგულირების სააგენტოს დირექტორმა, ზაალ კაპანაძემ მიმართა. უწყების ხელმძღვანელმა საქართველოში დაგეგმილ ცვლილებებზე გაამახვილა ყურადღება. ხაზი გაუსვა, რომ საქართველო მომდევნო წლიდან GMP და GDP სტანდარტზე გადადის და აღნიშნულ პროცესში პოლონური მხარის გამოცდილების გაზიარება ძალიან მნიშვნელოვანია.
„ფარმაციის სფეროში ევროპული საკანონმდებლო აქტების გაცნობას, პოლონეთის მარეგულირებელი ორგანოების მიერ განხორციელებული ინსპექტირების პროცესში ქართველი ინსპექტორების ჩართულობას, პოლონური მხარის ცოდნისა და გამოცდილების გაზიარებას დიდი მნიშვნელობა აქვს. ფარმაცევტული პროდუქციის მიმოქცევის სფეროში საქართველოს კანონმდებლობა ეროვნული ხასიათისაა, მაგრამ უახლოეს მომავალში ვგეგმავთ მოვამზადოთ საკანონმდებლო პაკეტი, რომელიც საქართველოს კანონმდებლობას ევროპულ რეგულაციებთან და სტანდარტებთან სრულ ჰარმონიზაციაში მოიყვანს. ამ მიმართულებით კი პოლონური მხარის თანადგომა უდიდესი მნიშვნელობის მატარებელია.
სააგენტოს ფარმაცევტული საქმიანობის ინსპექტირების პროცესში, დღეისათვის მნიშვნელოვანი გამოწვევაა კარგი საწარმოო (GMP) და კარგი სადისტრიბუციო (GDP) პრაქტიკის სტანდარტების სრული ამოქმედება. ამჟამად, ეს პროცესი ნებაყოფლობითია, თუმცა, 2022 წლის 1 იანვრიდან, მთავრობის განკარგულების საფუძველზე, ის სავალდებულო ხდება და ყველა მწარმოებელი და საბითუმო დისტრიბუტორი ვალდებულია საქმიანობა გააგრძელოს მხოლოდ შესაბამისი სერტიფიკატის მიღების შემდეგ. ამ კუთხითაც პოლონეთის გამოცდილების გაზიარება, სტანდარტებისადმი მიდგომების და პროცედურული ნორმების გაცნობა მნიშვნელოვანი და მაგალითის მომცემი იქნება ქართველი ინსპექტორებისთვის“, - აღნიშნავს ზაალ კაპანაძე.
პროექტის ფარგლებში, რეგულირების სააგენტოს თანამშრომლები პრაქტიკულ გადამზადებას უშუალოდ პოლონეთში გაივლიან.
რეგულირების სააგენტოს, წამლის ინსპექტირების სამმართველოს უფროსი, ნანა შაშიაშვილი აღნიშნავს, რომ პოლონეთი-საქართველოს ერთობლივი თანამშრომლობის პროექტს უდიდესი მნიშვნელობა აქვს როგორც წამლის მიმოქცევის სფეროში საკანონმდებლო ბაზის ჰარმონიზების, ასევე ინსპექტირების უნიფიცირებული სტანდარტების, ნორმების და მიდგომების ჩამოყალიბების მიმართულებით, რაც საბოლოოდ უზრუნველყოფს ეფექტიანი, უვნებელი და ხარისხიანი, ევროპული სტანდარტის სამკურნალო საშუალებების მიმოქცევას საქართველოს ფარმაცევტულ ბაზარზე.