Plasmon

იხილეთ აფთიაქების ჩამონათვალი

სოლვეტუსანი / Solvetusan

1. რა არის სოლვეტუსანი და რისთვის გამოიყენება

სოლვეტუსანი მოქმედი ნივთიერების სახით შეიცავს ლევოდროპროპიზინს, რომელიც თრგუნავს ხველას და ხსნის ბრონქოსპაზმს

სოლვეტუსანი ნაჩვენებია არაპროდუქტიული (მშრალი) ხველის სიმპტომების სამკურნალოდ.

მრავალი მონაცემი მიუთითებს, რომ მედიკამენტი ეფექტურია სხვადასხვა წარმოშობის ხველების დათრგუნვაში, როგორიცაა ხველება ფილტვის კიბოს დროს, ზედა და ქვედა სასუნთქი გზების ინფექციებთან დაკავშირებული ხველება, ასევე ყივანახველას დროს.

7 დღის შემდეგ თუ თავს არ გრძნობთ უკეთესად ან გრძნობთ უარესად, აუცილებლად უნდა მიმართოთ ექიმს.

 

2. რა უნდა იცოდეთ სოლვეტუსანის გამოყენებამდე

არ გამოიყენოთ სოლვეტუსანი:

თუ ალერგიული ხართ მოქმედი ნივთიერების ან ამ პრეპარატის რომელიმე სხვა ინგრედიენტის მიმართ (ჩამოთვლილი პუნქტში 6);

თუ გაქვთ ბრონქული ჰიპერსეკრეცია და ბრონქული ეპითელიუმის წამწამების ანომალიები (კართაგენერის სინდრომი, ცილიარული დისკინეზია);

თუ ხართ ორსულად ან ძუძუთი კვებავთ.

 

გაფრთხილებები და სიფრთხილის ზომები

სოლვეტუსანის გამოყენებამდე გაესაუბრეთ თქვენს ექიმს ან ფარმაცევტს. სოლვეტუსანი გამოიყენება არაპროდუქტიული (მშრალი) ხველის სიმპტომების სამკურნალოდ და მისი გამოყენება შესაძლებელია მხოლოდ ხველის მიზეზის დიაგნოსტირებამდე და/ან იმ დაავადების მკურნალობის ეფექტის დადგომამდე, რომელიც იწვევს ხველას.

 

ხანდაზმული პაციენტები

განსაკუთრებული სიფრთხილეა საჭირო ლევოდროპროპიზინის გამოყენებისას ხანდაზმულებში (65 წელზე მეტი ასაკის), რადგან არსებობს მტკიცებულება შეცვლილი მგრძნობელობის შესახებ მრავალი მედიკამენტის მიმართ ამ პაციენტების ჯგუფში.

 

თირკმლის უკმარისობის მქონე პაციენტები

სიფრთხილეა რეკომენდებული პრეპარატის გამოყენებისას პაციენტებში თირკმლის მძიმე უკმარისობით (კრეატინინის კლირენსი < 35 მლ/წთ).

 

ბავშვები

მედიკამენტი არ გამოიყენება 2 წლამდე ასაკის ბავშვებში.

 

სხვა მედიკამენტები და სოლვეტუსანი

აცნობეთ თქვენს ექიმს ან ფარმაცევტს, თუ იღებთ, ცოტა ხნის წინ მიიღეთ ან შესაძლოა მიიღოთ სხვა მედიკამენტები.

ადამიანებზე ჩატარებულ კვლევებში, ლევოდროპროპიზინის მიღებისას EEG ტალღის ფორმაში ცვლილებები არ დაფიქსირებულა ბენზოდიაზეპინებთან (სედატივებთან) კომბინაციაში.

სედატიური პრეპარატების ერთდროულად მიღებისას საჭიროა განსაკუთრებული სიფრთხილე მგრძნობიარე პაციენტებში.

 

სოლვეტუსანი საკვებთან და სასმელთან ერთად

რადგან არ არსებობს ინფორმაცია პრეპარატის შეწოვაზე საკვების გავლენის შესახებ, რეკომენდებულია მისი მიღება კვებებს შორის.

 

ორსულობა და ძუძუთი კვება

თუ ხართ ორსულად ან ძუძუთი კვებავთ, ფიქრობთ, რომ შეიძლება იყოთ ორსულად ან გეგმავთ დაორსულებას, რჩევისთვის მიმართეთ ექიმს ან ფარმაცევტს ამ მედიკამენტის მიღებამდე.

მედიკამენტი უკუნაჩვენებია ორსულებში, ქალებში, რომლებიც გეგმავენ დაორსულებას და ასევე ძუძუთი კვების პერიოდში.

 

ავტომობილის მართვა და მექანიზმებთან მუშაობა

არ ჩატარებულა კვლევები ავტომობილის მართვის და/ან მექანიზმებთან მუშაობის უნარის შესაფასებლად. თუმცა, ვინაიდან მედიკამენტმა შეიძლება იშვიათ შემთხვევებში გამოიწვიოს ძილიანობა  (იხ. აგრეთვე პუნქტი 4 შესაძლო გვერდითი მოვლენები), პაციენტები, რომლებიც აპირებენ ავტომობილის მართვას ან მექანიზმებთან მუშაობას, უნდა იყვნენ გაფრთხილებული და ინფორმირებული ამ შესაძლებლობის შესახებ.

 

სოლვეტუსანი შეიცავს საქაროზას, პროპილ პარჰიდროქსიბენზოატს და მეთილის პარჰიდროქსიბენზოატს, ბენზილის სპირტს, პროპილენგლიკოლს, ეთანოლს და ნატრიუმს.

 

საქაროზა

10 მლ სოლვეტუსანის სიროფი შეიცავს 4 გ საქაროზას. თუ ექიმს ნათქვამი აქვს, რომ გაქვთ აუტანლობა ზოგიერთი შაქრის მიმართ, მედიკამენტის გამოყენებამდე მიმართეთ ექიმს.

 

პროპილ პარაჰიდროქსიბენზოატი და მეთილის პარაჰიდროქსიბენზოატი

მედიკამენტი შეიცავს პროპილ პარჰიდროქსიბენზოატს და მეთილის პარჰიდროქსიბენზოატს, რამაც შეიძლება გამოიწვიოს ალერგიული რეაქციები (შესაძლოა დაგვიანებული), როგორიცაა კონტაქტური დერმატიტი, იშვიათად: დაუყოვნებელი ტიპის რეაქციები, როგორიცაა ჭინჭრის ციება ან ბრონქოსპაზმი.

 

ბენზილის სპირტი

მედიკამენტი შეიცავს 0,2 მგ ბენზილის სპირტს 10 მლ სიროფში.

ბენზილის სპირტმა შეიძლება გამოიწვიოს ალერგიული რეაქციები.

თქვენი ექიმის ან ფარმაცევტის რეკომენდაციის გარეშე მცირეწლოვან ბავშვებში (3 წელზე ნაკლები ასაკის) არ გამოიყენოთ ერთ კვირაზე მეტი ხნის განმავლობაში.

რჩევისთვის მიმართეთ თქვენს ექიმს ან ფარმაცევტს, თუ ხართ ორსულად ან ძუძუთი კვებავთ. დიდი რაოდენობით ბენზილის სპირტი შეიძლება დაგროვდეს თქვენს ორგანიზმში და შეიძლება გამოიწვიოს გვერდითი მოვლენები (ე.წ. "მეტაბოლური აციდოზი").

რჩევისთვის მიმართეთ თქვენს ექიმს ან ფარმაცევტს, თუ გაქვთ ღვიძლის ან თირკმელების დარღვევები. დიდი რაოდენობით ბენზილის სპირტი შეიძლება დაგროვდეს თქვენს ორგანიზმში და შეიძლება გამოიწვიოს გვერდითი მოვლენები (ე.წ. "მეტაბოლური აციდოზი").

 

პროპილენგლიკოლი

მედიკამენტი10 მლ სიროფში შეიცავს 13 მგ პროპილენგლიკოლს.

 

ეთანოლი

ეს მედიკამენტი 10 მლ სიროფში შეიცავს 4 მგ ალკოჰოლს (ეთანოლს). ალკოჰოლის რაოდენობა ამ მედიკამენტის 10 მლ-ში უდრის დაახლოებით 1 მლ ლუდს ან დაახლოებით 1 მლ ღვინოს.

ამ მედიკამენტში ალკოჰოლის მცირე რაოდენობა არ გამოიწვევს შესამჩნევ ეფექტს.

 

ნატრიუმი

მედიკამენტი 10 მლ სიროფში შეიცავს 7,82 მგ ნატრიუმს.

მედიკამენტი 30 მლ სიროფში შეიცავს 23,46 მგ ნატრიუმს (სუფრის მარილის ძირითად კომპონენტს). ეს უდრის ზრდასრულთათვის ნატრიუმის მაქსიმალური ყოველდღიური დიეტური მოხმარების 1,17%-ს.

 

3. სოლვეტუსანის გამოყენების წესი

ყოველთვის მიიღეთ ეს წამალი ზუსტად ისე, როგორც ეს აღწერილია ამ ინსტრუქციაში ან როგორც თქვენმა ექიმმა ან ფარმაცევტმა გირჩიათ. თუ არ ხართ დარწმუნებული, მიმართეთ ექიმს ან ფარმაცევტს.

არ მიიღოთ სოლვეტუსანი 7 დღეზე მეტი ხნის განმავლობაში ექიმთან კონსულტაციის გარეშე.

რეკომენდებული დოზა

2 წელზე უფროსი ასაკის ბავშვები:

10-20 კგ: 3 მლ სიროფი 3-ჯერ დღეში;

21-30 კგ: 5 მლ სიროფი 3-ჯერ დღეში;

31-40 კგ: 8 მლ სიროფი 3-ჯერ დღეში.

ზრდასრულები და 12 წელზე უფროსი ასაკის მოზარდები, რომელთა წონა 40 კგ-ზე მეტია:

10 მლ სიროფი 3-ჯერ დღეში.

 

გამოყენების წესი

სოლვეტუსანის მიიღება პერორალურად, 3-ჯერ დღეში მინიმუმ 6 საათის ინტერვალით.

სიროფის ბოთლს მოყვება საზომი ჭიქა პრეპარატის დოზის, მათ შორის 3, 5 და 10 მლ-ს გასაზომად. ბოთლი აღჭურვილია დამატებითი დამცავი მოწყობილობით-დახურული თავსახურით, რომელიც იცავს ბავშვების წვდომისგან. ბოთლის გასახსნელად დააჭირეთ თავსახურს და დაატრიალეთ ისრით მითითებული მიმართულებით.

 

მკურნალობა უნდა გაგრძელდეს სანამ ხველა არ ჩაცხრება ან ექიმის რეკომენდაციის მიხედვით.

მკურნალობის დაწყებიდან 7 დღის შემდეგ ხველის გაგრძელების შემთხვევაში, სასურველია შეწყვიტოთ პრეპარატის მიღება და მიმართოთ ექიმს. გთხოვთ, გახსოვდეთ, რომ ხველა არის ძირითადი დაავადების სიმპტომი, რომელიც საჭიროებს დიაგნოსტიკას და შემდეგ მკურნალობას.

თუ გამოიყენეთ საჭიროზე მეტი სოლვეტუსანი

თუ მიიღებთ რეკომენდებულზე მეტ დოზას, დაუყოვნებლივ აცნობეთ ექიმს ან ფარმაცევტს. კლინიკური სიმპტომებით დოზის გადაჭარბების შემთხვევაში ექიმი დაუყოვნებლივ დანიშნავს სიმპტომურ მკურნალობას და საჭიროების შემთხვევაში გამოიყენებს ზოგად გადაუდებელ ზომებს (კუჭის ამორეცხვა, გააქტიურებული ნახშირი, სითხის მიწოდება პარენტერალური გზით და ა.შ.).

თუ დაგავიწყდათ სოლვეტუსანის მიღება

არ მიიღოთ გაორმაგებული დოზა გამოტოვებული დოზის ასანაზღაურებლად.

თუ დაგავიწყდათ სოლვეტუსანის მიღება, შემდეგი დოზა უნდა მიიღოთ ჩვეულებრივ დროს.

ამ მედიკამენტის გამოყენებასთან დაკავშირებით დამატებითი შეკითხვების არსებობის შემთხვევაში, მიმართეთ თქვენს ექიმს ან ფარმაცევტს.

 

4. შესაძლო გვერდითი მოვლენები

ყველა მედიკამენტის მსგავსად, ამ პრეპარატსაც შეუძლია გამოიწვიოს გვერდითი მოვლენები, თუმცა ისინი ყველას არ უვითარდება.

გვერდითი მოვლენები ძალიან იშვიათია სოლვეტუსანის გამოყენებისას. უმეტეს შემთხვევაში, ეს არ არის მძიმე გართულებები და სიმპტომები ქრება მკურნალობის შეწყვეტის შემდეგ, მხოლოდ ხანდახან საჭიროებს სპეციფიკურ ფარმაკოლოგიურ მკურნალობას.

სოლვეტუსანის მიღება უნდა შეწყდეს და დაუყოვნებლივ უნდა მიმართოთ ექიმს ან მიხვიდეთ უახლოეს საავადმყოფოს გადაუდებელი დახმარების განყოფილებაში, თუ განგივითარდათ რომელიმე შემდეგი გვერდითი მოვლენა:
ალერგიული რეაქცია, რომელიც ვითარდება მედიკამენტის მიღებიდან 20 წუთის განმავლობაში (გამონაყარი, სახის, პირის ან ყელის ძლიერი შეშუპება, სუნთქვის, ლაპარაკის ან ყლაპვის გაძნელება, არტერიული წნევის სწრაფი დაქვეითება, ნელი ან სწრაფი პულსი, ფერის დაკარგვა, შფოთვა, ოფლიანობა, თავბრუსხვევა, უგონო მდგომარეობა, სუნთქვის და გულის გაჩერება);
ანგიონევროზული შეშუპება (მძიმე ალერგიული რეაქცია - ტუჩების, ენის, ყელის, სახის, კიდურების ან სახსრების უეცარი შეშუპება ქავილის ან ტკივილის გარეშე). თავისა და კისრის არეში შეშუპებამ შეიძლება გამოიწვიოს ყლაპვისა და სუნთქვის გაძნელება;
კანის მძიმე რეაქციები (ჭინჭრის ციება, ქავილი) ან კანის დაავადებები, მაგ. ბუშტუკებით (ეპიდერმოლიზი);

გულის არითმიები (არარეგულარული გულისცემა, წინაგულების ბიგემინიის რისკი);

ჰიპოგლიკემიური კომა;

გულის წასვლა;

კონვულსიები.

 

ჩამოთვლილი გვერდითი მოვლენების განვითარების შემთხვევაში დაუყოვნებლივ მიმართეთ ექიმს, რადგან მათ შესაძლოა მოჰყვეს სიცოცხლისთვის საშიში შედეგები.

 

გარდა ამისა, თქვენ შეიძლება განიცადოთ:

ძალიან იშვიათი (10.000 პაციენტიდან 1-ზე ნაკლებში):

ჭინჭრის ციება, ერითემა, ეგზანთემა, ქავილი, კანის რეაქციები;

კუჭის ტკივილი, მუცლის ტკივილი, გულისრევა, ღებინება, დიარეა;

ზოგადი სისუსტე;

თავბრუსხვევა, დისბალანსი, ტრემორი, ჩხვლეტის შეგრძნება, დაბუჟება;

გულის დარღვევები (პალპიტაცია, ტაქიკარდია), არტერიული წნევის დაქვეითება;

გაღიზიანება, ლეთარგია, დეპერსონალიზაცია (საკუთარი თავის გაუცხოების გრძნობა);

დისპნოე, ხველა, სასუნთქი გზების ლორწოვანი გარსის შეშუპება;

ასთენია (სხეულის ზოგადი სისუსტე) და ქვედა კიდურების სისუსტე.

 

უცნობი (ხელმისაწვდომი მონაცემებით სიხშირის დადგენა შეუცლებელია):

გლოსიტი და აფთოზური სტომატიტი ცხელებით;

ქოლესტაზური ჰეპატიტი (ანთებითი მდგომარეობა, რომელიც გამოწვეულია ღვიძლიდან ნაღვლის გადინების შეჩერებით);

გენერალიზებული შეშუპების, გულის წასვლის და სისუსტის შემთხვევები;

ეპილეფსიური კრუნჩხვები: ძირითადი ეპილეფსიური კრუნჩხვები (ტონურ-კლონური კრუნჩხვები) და მცირე ეპილეფსიური კრუნჩხვები (არაკონვულსიური, ე.წ. აბსანსური გულყრა)

გუგის გაფართოება და მხედველობის დაკარგვა. ორივე შემთხვევაში სიმპტომები გაქრა წამლის შეწყვეტის შემდეგ;

ლეთარგია, კუნთების ტონუსის დაქვეითება და ღებინება ახალშობილში, რაც მიეკუთვნა ლევოდროპროპიზინს, რომელიც მიღებულ იქნა მეძუძური დედის მიერ და რომელმაც, შეაღწია ბავშვის სხეულში. სიმპტომები გაჩნდა ძუძუთი კვების შემდეგ და სპონტანურად გაქრა ძუძუთი კვების რამდენიმე სეანსის გამოტოვების შემდეგ;

ქუთუთოების შეშუპება.

სოლვეტუსანის პაციენტის ინსტრუქციაში მითითებული რეკომენდაციების მიხედვით გამოყენება, ამცირებს გვერდითი მოვლენების განვითარების რისკს.

 

გვერდითი მოვლენების შეტყობინება

რომელიმე გვერდითი მოვლენის განვითარების შემთხვევაში მიმართეთ თქვენს ექიმს, ფარმაცევტს ან ექთანს. ეს მოიცავს ნებისმიერ შესაძლო გვერდით მოვლენასაც, რომელიც არ არის ნახსენები ინსტრუქციაში.

გვერდითი მოვლენების შესახებ ასევე შეგიძლიათ უშუალოდ სამკურნალო საშუალებების, სამედიცინო ხელსაწყოებისა და ბიოციდური პროდუქტების რეგისტრაციის ოფისს შეატყობინოთ.

Al. Jerozolimskie 181 C, 02-222 ვარშავა

ტელ: +48 22 49 21 301

ფაქსი: + 48 22 49 21 309

ვებ-გვერდი: https://smz.ezdrowie.gov.pl

გვერდითი მოვლენების შესახებ ასევე შეიძლება ეცნობოს სავაჭრო ნებართვის მფლობელს.

გვერდითი მოვლენების შეტყობინებით, თქვენ შეგიძლიათ დაეხმაროთ ამ მედიკამენტის უსაფრთხოების შესახებ მეტი ინფორმაციის შეგროვებას.

 

5. სოლვეტუსანის შენახვის პირობები

შეინახეთ ეს მედიკამენტი ბავშვებისთვის მიუწვდომელ ადგილას.

ინახება 25°C-ზე დაბალ ტემპერატურაზე. არ შეინახოთ მაცივარში ან გაყინოთ.

არ გამოიყენოთ ეს წამალი ვარგისობის ვადის გასვლის შემდეგ, რომელიც მითითებულია ეტიკეტზე და მუყაოს კოლოფზე.

ვარგისობის ვადა ეხება მითითებული თვის ბოლო დღეს.

შენახვის ვადა ბოთლის პირველი გახსნის შემდეგ: 12 თვე.

არ გადააგდოთ წამალი კანალიზაციაში ან საყოფაცხოვრებო ნაგავში. ჰკითხეთ თქვენს ფარმაცევტს, როგორ გაანადგუროთ მედიკამენტები, რომლებსაც აღარ იყენებთ. ეს ზომები ხელს შეუწყობს გარემოს დაცვას.

 

6. შეფუთვის შემცველობა და სხვა ინფორმაცია

რას შეიცავს სოლვეტუსანი

პრეპარატის აქტიური ნივთიერებაა ლევოდროპროპიზინი.
10 მლ სიროფი შეიცავს 60 მგ ლევოდროპროპიზინს.

სხვა ინგრედიენტებია: საქაროზა, ლიმონმჟავას მონოჰიდრატი, მეთილის პარჰიდროქსიბენზოატი (E 218), პროპილ პარჰიდროქსიბენზოატი (E 216), ალუბლის არომატი (ეთილის აცეტატი, იზოამილის აცეტატი, ბენზალდეჰიდი, ბენზილის სპირტი, ევგენოლი, ვანილინი, ეთანოლი, პროპილენ გლიკოლი), ნატრიუმის ჰიდროქსიდი, 32% ხსნარი, გამოხდილი წყალი.

 

როგორ გამოიყურება სოლვეტუსანი და შეფუთვის შემცველობა

სოლვეტუსანი მოცემულია სიროფის სახით, უფეროდან ღია ყვითლა შეფერილობამდე, ალუბლის არომატით და სუნით.

 

შეფუთვა არის III კლასის ნარინჯისფერი მინის ბოთლი, რომელიც დახურულია ბავშვისთვის რეზისტენტული LDPE/PP ხრახნიანი თავსახურით და 15 მლ PP საზომი ჭიქით, გრადუირებული 2.5 მლ, 3 მლ, 5 მლ, 10 მლ, 15 მლ, მუყაოს კოლოფში. შეფუთვა შეიცავს 150 მლ ან 200 მლ სიროფს.

სად შევიძინოთ?