ბავშვთა უროლოგია

ცხოვრების პირველ წლებში ჩუჩის უკან არგადაწევა (ფიზიოლოგიური ფიმოზი) ნორმაა და ბიჭების უმეტესობაში ის 3-5 წლისთვის, ნაწილში კი მოზარდობამდე თავისით უმჯობესდება - ძალით უკან წევა აკრძალულია, რადგან ნაწიბურებს ტოვებს. ექიმთან ვიზიტი საჭიროა, თუ შარდვისას ჩუჩა ბუშტულასავით ბერდება, ხშირად ანთდება, ან შარდვა გაძნელებულია. ჩუჩის უკან გადაწევის შემდეგ თავის უკან ჩარჩენა და შეშუპება კი გადაუდებელი მდგომარეობაა.

სათესლე ჩვეულებრივ დაბადებამდე ან სიცოცხლის პირველ თვეებში ჩამოდის - თუ 6 თვის ასაკისთვის ცალი ან ორივე სათესლე პარკში არ ჩამოსულა, საჭიროა ბავშვთა უროლოგის შეფასება. ოპერაცია (ორქიოპექსია) ჩვეულებრივ 6-18 თვის ასაკში ტარდება, რადგან დაგვიანება ზრდის მომავალში უნაყოფობისა და სათესლის სიმსივნის რისკს. თუ სათესლე ხან ჩანს, ხან ქრება (მოძრავი სათესლე), ეს ხშირად ნორმის ვარიანტია, მაგრამ ისიც ექიმმა უნდა შეაფასოს.

სათესლის უეცარი, ძლიერი ტკივილი (ხშირად გულისრევითა და შეშუპებით) სათესლის შემოგრეხვის ნიშანია და გადაუდებელი ქირურგიული მდგომარეობაა - დაუყოვნებლივ მიმართეთ უახლოეს კლინიკას ან გამოიძახეთ სასწრაფო. სათესლის გადარჩენის ალბათობა ყველაზე მაღალია პირველი 6 საათის განმავლობაში, ამიტომ ლოდინი და ტკივილგამაყუჩებლით ჩაცხრობის ცდა დაუშვებელია. ეს მოზარდ ბიჭებში ყველაზე ხშირია, მაგრამ ნებისმიერ ასაკში შეიძლება მოხდეს.

ბავშვში 2 ან მეტი დადასტურებული შარდგზების ინფექცია (ან თუნდაც ერთი მაღალი ცხელებით) ხშირად თანდაყოლილი პრობლემის - მაგალითად, შარდის უკუდინების (რეფლუქსის) - ნიშანია, რომელიც განმეორებით ინფექციებს იწვევს და თირკმილს აზიანებს. ამიტომ ინიშნება ექოსკოპია და საჭიროებისას კონტრასტული კვლევა. მიზეზის დროული აღმოჩენა და მკურნალობა (მედიკამენტური ან ქირურგიული) თირკმლის უკუშექცევადი დაზიანების პრევენციას ემსახურება.

გეგმური ოპერაციის წინ ბავშვს უტარდება საბაზისო ანალიზები და ანესთეზიოლოგის კონსულტაცია, ხოლო აქტიური სურდო ან ცხელება ოპერაციის გადადების საფუძველია - ამის შესახებ ექიმს წინასწარ აცნობეთ. ჭამისა და სმის შეწყვეტის ზუსტ დროს (ასაკის მიხედვით) კლინიკა გაცნობებთ. ბავშვს ესაუბრეთ დამამშვიდებლად, აუხსენით, რომ დაიძინებს და გაღვიძებისას თქვენ დაგინახავთ - ბავშვთა უროლოგიური ოპერაციების უმეტესობა დღის სტაციონარშივე სრულდება.