დიკლობერლი® რეტარდი / Dicloberl® retard
- საერთაშორისო დასახელება (აქტიური ნივთიერება): diclofenac
- კლინიკურ-ფარმაკოლოგიური ჯგუფი: ანთების საწინააღმდეგო საშუალებები → არასტეროიდული ანთების საწინააღმდეგო საშუალებები → არასტეროიდული ანთების საწინააღმდეგო საშუალებები სისტემური გამოყენებისათვის → ფენილძმარჟავას წარმოებულები
- მწარმოებელი კომპანია: BERLIN-CHEMIE AG
- მწარმოებელი ქვეყანა: გერმანია
- გამოშვების ფორმა: 100მგ კაფსულა #20
- გაცემის რეჟიმი: III ჯგუფი (ურეცეპტოდ)
1. დიკლობერლი® რეტარდის აღწერა და გამოყენება
ნივთიერებათა ჯგუფი, გამოყენების ჩვენება ან მოქმედების მექანიზმი
დიკლობერლი® რეტარდი არის ტკივილგამაყუჩებელი და ანთების საწინააღმდეგო
სამკურნალო საშუალება (არასტეროიდული ანთების საწინააღმდეგო/
ანტირევმატული საშუალება, აასს).
გამოყენების ჩვენება
ტკივილისა და ანთების სიმპტომური მკურნალობა შემდეგ შემთხვევებში:
- სახსრების მწვავე ანთებები (მწვავე ართრიტი), პოდაგრის შეტევების ჩათვლით;
- სახსრების ქრონიკული ანთებითი დაავადებები (ქრონიკული ართრიტი), კერძოდ, რევმატოიდული ართრიტი (ქრონიკული პოლიართრიტი);
- ბეხტერევის დაავადება (მაანკილოზებელი სპონდილიტი) და ხერხემლის სხვა ანთებითი და რევმატული დაავადებები;
- ქსოვილების გაღიზიანება სახსრების და ხერხემლის დეგენერაციული დაავადებების დროს (ართროზები და სპონდილოართროზები);
- რბილი ქსოვილების ანთებით მიმდინარე რევმატიზმი;
- ტკივილის სინდრომით მიმდინარე შეშუპებები ან პოსტ-ტრავმული ანთებები.
დიკლობერლი® რეტარდის კაფსულიდან მოქმედი ნივთიერების დიკლოფენაკის გამოთავისუფლების გახანგრძლივებასთან დაკავშირებით პრეპარატის მოქმედება იწყება გვიან. ამიტომ, დიკლობერლი® რეტარდი არ გამოიყენება ისეთი დარღვევების სამკურნალოდ, რომელიც საჭიროებს მოქმედების სისწრაფეს – მაგალითად, მკურნალობის დასაწყისში.
აცნობეთ მკურნალ ექიმს, თუ არ გრძნობთ თავს უკეთ ან გრძნობთ მდგომარეობის გაუარესებას.
2. რას უნდა მიაქციოთ ყურადღება პრეპარატ დიკლობერლი® რეტარდის მიღების დაწყებამდე
დიკლობერლი® რეტარდის მიღება არ შეიძლება შემდეგ შემთხვევებში:
- ალერგია დიკლოფენაკის ან მოცემული პრეპარატის სხვა კომპონენტების მიმართ (მითითებულია პარაგრაფში 6);
- თუ აცეტილსალიცილის მჟავას ან სხვა არასტეროიდული ანთების საწინააღმდეგო საშუალებების (აასს) მიღების შემდეგ წარსულში ადგილი ჰქონდა ისეთ რეაქციებს, როგორიცაა სუნთქვის გაძნელება (ბრონქოსპაზმი), ასთმის შეტევა, ცხვირის ლორწოვანი გარსის შეშუპება ან რეაქციები კანის მხრივ;
- გაურკვეველი მიზეზით სისხლის წარმოქმნის დარღვევა;
- ამჟამად ან წარსულში კუჭის/თორმეტგოჯა ნაწლავის წყლულის (პეპტიური წყლული) ან სისხლდენის (წყლულის ან სისხლდენის სულ მცირე ორი ერთმანეთისგან დამოუკიდებელი ეპიზოდები) განმეორებითი შემთხვევები;
- წარსულში სისხლდენა კუჭ-ნაწლავის ტრაქტიდან ან პერფორაცია, დაკავშირებული არასტეროიდული ანთების საწინააღმდეგო საშუალებების (აასს- ის) მიღებასთან;
- ამჟამად კუჭის ან ნაწლავის წყლული სისხლდენით ან პერფორაციით (აღნიშნულს შეიძლება თან ახლდეს სისხლიანი ღებინება, სისხლდენა დეფეკაციის დროს, ახალი სისხლი განავალში ან შავი კუპრისებრი განავალი);
- სისხლჩაქცევა თავის ტვინში (ცერებრო-ვასკულური სისხლდენა) ან სხვა ახალი სისხლდენა;
- ღვიძლის ან თირკმელების ფუნქციის მძიმე დარღვევები;
- გულის დიაგნოსტირებული დაავადება ან/და თავის ტვინის სისხლძარღვების დაავადებები, მაგალითად, თუ გადატანილი გაქვთ მიოკარდიუმის ინფარქტი, ინსულტი, მინი ინსულტი (ტრანზიტორული იშემიური შეტევა), გულის ან ტვინის სისხლძარღვების გამტარობის დარღვევის დროს ან ამ დარღვევის აღმოსაფხვრელად ჩატარებული ოპერაციის დროს, ან შეგუბებული სისხლძარღვის შუნტირება;
- ამჟამად ან წარსულში არსებული სისხლის მიმოქცევის დარღვევები
(პერიფერიული არტერიების დაავადება);
- ორსულობის ბოლო ტრიმესტრი.
პრეპარატში მოქმედი ნივთიერების მაღალი შემცველობის გამო დიკლობერლი® რეტარდის გამოყენება ბავშვებში და 18 წლამდე ასაკის მოზარდებში სამკურნალოდ მიზანშეწონილი არ არის.
გაფრთხილება და სიფრთხილის ზომები
პრეპარატი დიკლობერლი® რეტარდის მიღებამდე კონსულტაციისთვის მიმართეთ
ექიმს ან ფარმაცევტს.
ზოგადი ინფორმაცია
მოერიდეთ პრეპარატ დიკლობერლი® რეტარდის და სხვა არასტეროიდული ანთების
საწინააღმდეგო საშუალების ჯგუფის პრეპარატების ერთდროულად მიღებას, ე.წ. ცოგ-2-ის ინჰიბიტორების (ციკლოოქსიგენაზა-2-ის სელექციური ინჰიბიტორების) ჩათვლით - რადგან არ არის ეფექტის გაუმჯობესების რაიმე მტკიცებულება და შესაძლებელია განვითარდეს უფრო მრავალრიცხოვანი ან უფრო გამოხატული გვერდითი მოქმედებები.
გვერდითი მოქმედებების მინიმუმამდე დაყვანა შესაძლებელია პრეპარატის უმცირესი ეფექტური დოზის რაც შეიძლება მოკლე დროის განმავლობაში მიღების გზით, რაც აუცილებელია სიმპტომების მოსახსნელად (იხ. პარაგრაფი 3 ~დიკლობერლი® რეტარდის მიღების წესი~).
ხანდაზმული პაციენტები:
უსაფრთხოების თვალსაზრისით ხანდაზმული ასაკის პაციენტების მკურნალობისას საჭიროა სიფრთხილის დაცვა. კერძოდ, რეკომენდებულია, ხანდაზმული ასაკის
დაუძლურებულ ან სხეულის დაბალი წონის მქონე პაციენტებს დაენიშნოთ პრეპარატის მინიმალური ეფექტური დოზა. ხანდაზმულ პაციენტებში მომატებულია არასტეროიდული ანთების საწინააღმდეგო საშუალებების (აასს) გვერდითი მოქმედებების განვითარების სიხშირე, განსაკუთრებით ისეთების, როგორიცაა კუჭ- ნაწლავის ტრაქტიდან სისხლდენა, წყლულის და პერფორაციის განვითარება. ხანდაზმულ პაციენტებში აღნიშნულ რეაქციებს კუჭ-ნაწლავის ტრაქტის მხრივ აქვს უფრო სერიოზული შედეგები და შეიძლება პაციენტი მიიყვანოს ლეტალურ შედეგამდე. ამიტომ, ხანდაზმულ პაციენტებში საჭიროა განსაკუთრებით მკაცრი საექიმო კონტროლი.
კუჭ-ნაწლავის ტრაქტიდან სისხლდენა, წყლული და პერფორაცია:
არსებობს მონაცემები ნებისმიერი აასს გამოყენებისას კუჭ-ნაწლავის ტრაქტიდან სისხლდენის, წყლულისა და პერფორაციის შესახებ, მათ შორის ლეტალური შედეგით. აღნიშნული გართულებები შეიძლება გამოვლინდეს მკურნალობის ნებისმიერ ეტაპზე - წინასწარი სიმპტომების (მიმანიშნებელი სიმპტომების) ან მათი გამოვლენის გარეშე, წარსულში კუჭ-ნაწლავის ტრაქტის სერიოზული დაავადებების არსებობისას, ან მათ გარეშე.
წარსულში წყლულის მქონე პაციენტებში – განსაკუთრებით გართულებული სისხლდენით ან პერფორაციით (იხ. პარაგრაფი 2 “დიკლობერლი® რეტარდის მიღება არ შეიძლება შემდეგ შემთხვევებში:”), ასევე ხანდაზმულ პაციენტებში - კუჭ-ნაწლავის ტრაქტიდან სისხლდენის, წყლულისა და პერფორაციის განვითარების რისკი იზრდება აასს-ის დოზის გაზრდის შემთხვევაში. ასეთი პაციენტების მკურნალობის დაწყება და გაგრძელება, რეკომენდებულია რაც შეიძლება დაბალი დოზებით.
ამ პაციენტებისთვის, აგრეთვე მათ, ვისაც ესაჭიროება დამატებითი თერაპია აცეტილსალიცილის მჟავის (ასმ) დაბალი დოზებით ან სხვა პრეპარატებით, რომლებიც იწვევს კუჭ-ნაწლავის მხრივ გართულების რისკის გაზრდას, აუცილებელია განიხილოს კუჭის ლორწოვანი გარსის დამცავი საშუალებებით (მაგალითად, მიზოპროსტოლი ან პროტონის ტუმბოს ინჰიბიტორები) კომბინირებული თერაპიის დანიშვნის შესაძლებლობა.
თუ წარსულში გქონდათ კუჭ-ნაწლავის ტრაქტის მხრივ გვერდითი მოვლენები, განსაკუთრებით, თუ ხართ ხანდაზმული, ექიმს უნდა აცნობოთ ყველა უჩვეულო სიმპტომის შესახებ მუცლის ღრუს ორგანოების მხრივ (პირველ რიგში კუჭ- ნაწლავის ტრაქტიდან სისხლდენა), განსაკუთრებით მკურნალობის საწყის ეტაპზე. რეკომენდებულია სიფრთხილის დაცვა, თუ ერთდროულად იღებთ პრეპარატებს, რომლებმაც შესაძლოა გაზარდოს წყლულის ან სისხლდენის განვითარების რისკი,
უკუმიტაცების სელექციური ინჰიბიტორები, რომლებიც, სხვა პრეპარატებთან ერთად, გამოიყენება დეპრესიული მდგომარეობების დროს, ან თრომბოციტების აგრეგაციის ინჰიბიტორები, მაგალითად, აცეტილსალიცილის მჟავა (იხ. პარაგრაფი 2 ~პრეპარატ დიკლობერლი® რეტარდის მიღება სხვა სამკურნალო საშუალებებთან~).
დიკლობერლი® რეტარდის მიღებისას კუჭ-ნაწლავის ტრაქტიდან სისხლდენის ან წყლულის შემთხვევაში პრეპარატის მიღება უნდა შეწყდეს.
კუჭ-ნაწლავის ტრაქტის მხრივ დარღვევების მიმანიშნებელი სიმპტომების, ანამნეზში კუჭის ან თორმეტგოჯა ნაწლავის წყლულის, სისხლდენის ან პერფორაციის მქონე პაციენტების, ან წარსულში კუჭ-ნაწლავის ტრაქტის პათოლოგიის მქონე ავადმყოფების (არასპეციფიური წყლულოვანი კოლიტი, კრონის დაავადება) აასს-ით მკურნალობა საჭიროა სიფრთხილით, საგულდაგულო საექიმო დაკვირვებით, რადგან ასეთი პაციენტების მდგომარეობა შეიძლება გაუარესდეს (იხ. პარაგრაფი 4 ~შესაძლო გვერდითი მოქმედება~).
მოქმედება გულ-სისხლძარღვთა სისტემაზე
ისეთი მედიკამენტების გამოყენება, როგორიცაა დიკლობერლი® რეტარდი, შეიძლება
დაკავშირებული იყოს გულის შეტევის (~მიოკარდიუმის ინფარქტის~) ან ინსულტის განვითარების რისკის გაზრდასთან.
დარწმუნდით, რომ მკურნალი ექიმი ინფორმირებულია იმის შესახებ, რომ თქვენ იღებთ დიკლობერლი® რეტარდს:
- თუ თქვენ ეწევით
- თუ თქვენ გაქვთ შაქრიანი დიაბეტი
- თუ ადგილი აქვს სტენოკარდიას, თრომბოზს, მაღალ არტერიულ წნევას, ქოლესტერინის ან ტრიგლიცერიდების მომატებულ დონეს.
გვერდითი მოქმედებების მინიმუმამდე დაყვანა შესაძლებელია პრეპარატის უმცირესი ეფექტური დოზის რაც შეიძლება მოკლე დროის განმავლობაში მიღების გზით, რაც აუცილებელია სიმპტომების მოსახსნელად.
თუ თქვენ გაქვთ გულის დაავადებები ან გადატანილი გაქვთ ინსულტი, მკურნალობასთან დაკავშირებულ საკითხზე მიმართეთ ექიმს ან ფარმაცევტს.
რეაქციები კანის მხრივ
არსებობს ცნობები იმის შესახებ, რომ ძალიან იშვიათ შემთხვევებში აასს-ის გამოყენება უკავშირდება კანის მხრივ მძიმე რეაქციებს კანის გაწითლებით და ბუშტუკების წარმოქმნით, ზოგჯერ ლეტალური გამოსავლით (ექსფოლიაციური დერმატიტი, სტივენს-ჯონსონის სინდრომი და ტოქსიური ეპიდერმული ნეკროლიზი/ლაიელის სინდრომი; იხ. პარაგრაფი 4 ~შესაძლო გვერდითი მოქმედება~). როგორც ჩანს, აღნიშნული სახის რეაქციების განვითარების რისკი მკურნალობის დასაწყისში უფრო მაღალია, რადგან უმეტეს შემთხვევაში კანის რეაქციების გამოვლენა ხდება პრეპარატით მკურნალობის დაწყებიდან პირველი თვის განმავლობაში. კანზე გამონაყარის, ლორწოვანი გარსების (მაგალითად, პირის ღრუს ან ცხვირის) დაზიანებების პირველი ნიშნების ან მომატებული მგრძნობელობის რეაქციის სხვა სიმპტომების შემთხვევაში შეწყვიტეთ დიკლობერლი® რეტარდის მიღება და დაუყოვნებლივ მიმართეთ ექიმს.
ზემოქმედება ღვიძლზე
ღვიძლის ფუნქციის დარღვევების მქონე პაციენტებში პრეპარატი მიიღება სიფრთხილის დაცვით (ექიმის ან ფარმაცევტის რჩევით), რადგან მათი მდგომარეობა დიკლოფენაკით მკურნალობისას შეიძლება გაუარესდეს. როგორც სხვა აასს მიღებისას, დიკლოფენაკის მიღებისას შეიძლება გაიზარდოს ღვიძლის ერთი ან რამდენიმე ფერმენტის მნიშვნელობა. თავის დაცვის მიზნით, დიკლობერლი® რეტარდით ხანგრძლივი მკურნალობის ან მისი განმეორებითი შეყვანის შემთხვევაში საჭიროა ღვიძლის ფუნქციის რეგულარული კონტროლი. ღვიძლის ფუნქციის დარღვევის კლინიკური ნიშნების გამოვლენის შემთხვევაში დაუყოვნებლივ შეწყვიტეთ პრეპარატ დიკლობერლი® რეტარდით მკურნალობა. დიკლოფენაკის მიღებისას შეიძლება განვითარდეს ჰეპატიტი მიმანიშნებელი სიმპტომების გარეშე.
ღვიძლის პორფირიის მქონე პაციენტებში (სისხლის წარმოქმნის დარღვევებით მიმდინარე დაავადება) პრეპარატ დიკლობერლი® რეტარდის მიღებისას საჭიროა სიფრთხილის დაცვა, რადგან აღნიშნულმა შეიძლება გამოიწვიოს დაავადების გამწვავება.
ზემოქმედება თირკმელებზე
რადგან არსებობს ცნობები სითხის შეკავების და შეშუპების განვითარების შესახებ აასს-ის, მათ შორის დიკლოფენაკის მიღებისას, ამიტომ მისი დანიშვნისას საჭიროა განსაკუთრებული სიფრთხილის დაცვა ანამნეზში არტერიული ჰიპერტონიით თირკმელების ფუნქციის დარღვევების მქონე პაციენტებში, ხანდაზმულ პირებში, პაციენტებში, რომლებიც იღებენ კომბინირებულ მკურნალობას დიურეზულებით ან თირკმელების ფუნქციის მნიშვნელოვნად დამაქვეითებელი პრეპარატებით, აგრეთვე პაციენტებში ნებისმიერი გენეზის უჯრედგარე სითხის მოცულობის გამოხატული შემცირებით, მაგალითად, მნიშვნელოვანი ქირურგიული ჩარევის წინ ან შემდეგ. ამ შემთხვევაში, სიფრთხილის ზომის სახით დიკლოფენაკის მიღებისას რეკომენდებულია თირკმელების ფუნქციის კონტროლი. მკურნალობის შეწყვეტა, როგორც წესი, იწვევს მკურნალობამდე არსებული მდგომარეობის დაბრუნებას.
სხვა მითითებები
დიკლობერლი® რეტარდი უნდა დაინიშნოს მხოლოდ “სარგებელი/რისკის”
თანაფარდობის საგულდაგულო შეფასების შემდეგ:
- სისხლმბადი სისტემის ფუნქციის გარკვეული თანდაყოლილი დარღვევებისას
(მაგალითად, მწვავე გარდამავალი პორფირია);
- გარკვეული აუტოიმუნური დაავადებების დროს (სისტემური წითელი მგლურა და კომბინირებული კოლაგენოზები).
ექიმის განსაკუთრებული მეთვალყურეობაა საჭირო პრეპარატის მიღებისას:
- ალერგიის (მაგალითად, სხვა სამკურნალო საშუალებებზე გამოვლენილი კანის რეაქციები, ასთმა, პოლინოზი), ცხვირის ლორწოვანი გარსის ქრონიკული შეშუპების ან სასუნთქი გზების ქრონიკული დაავადებების დროს, რომლებიც მიმდინარეობს მათი შევიწროებით, ან ქრონიკული რესპირატორული ინფექციების დროს, რადგან იზრდება ალერგიული რეაქციების განვითარების რისკი.
მომატებული მგრძნობელობის მძიმე მწვავე რეაქციები (მაგალითად, ანაფილაქსიური შოკი) აღინიშნება იშვიათად. დიკლობერლი® რეტარდის მიღების შემდეგ განვითარებული მომატებული მგრძნობელობის რეაქციის პირველი ნიშნების გამოვლენების შემთხვევაში პრეპარატით თერაპია უნდა შეწყდეს. საჭირო - სიმპტომების შესაბამისი - სამედიცინო ღონისძიებები უნდა განხორციელდეს კომპეტენტური პირების მიერ.
დიკლოფენაკს შეუძლია დროებით დათრგუნოს სისხლის ფირფიტების აგრეგაცია. ამის გამო აუცილებელია სისხლის შედედების სისტემის დარღვევების მქონე პაციენტების საგულდაგულო მეთვალყურეობა.
როგორც სხვა აასს, დიკლოფენაკმა შეიძლება შენიღბოს ინფექციის სიმპტომები. პრეპარატ დიკლობერლი® რეტარდის მიღების დროს ინფექციის პირველი ნიშნების (მაგალითად, გაწითლება, შეშუპება, ტემპერატურის ადგილობრივი მომატება, ტკივილი, ცხელება) გამოვლენის ან გაუარესების შემთხვევაში დაუყოვნებლივ მიმართეთ ექიმს.
პრეპარატ დიკლობერლი® რეტარდის ხანგრძლივი მიღებისას საჭიროა თირკმელების ფუნქციის რეგულარული კონტროლი, აგრეთვე სისხლის საერთო ანალიზის ჩატარება.
დიკლობერლი® რეტარდის მიღების შემთხვევაში ქირურგიული ჩარევის წინ ამ პრეპარატით მკურნალობის შესახებ აცნობეთ ექიმს ან სტომატოლოგს.
ტკივილგამაყუჩებელი საშუალებების უფრო ხანგრძლივი მიღებისას შეიძლება გამოვლინდეს თავის ტკივილები, რომელთა მკურნალობა არ შეიძლება პრეპარატის დოზის გაზრდით. თუ, დიკლობერლი® რეტარდის მიღების მიუხედავად, ხშირად გაწუხებთ თავის ტკივილი, რჩევისათვის მიმართეთ თქვენს ექიმს!
ზოგადად, ტკივილგამაყუჩებელი საშუალებების ჩვეულმა მიღებამ, განსაკუთრებით რამოდენიმე ტკივილგამაყუჩებელი მოქმედი ნივთიერების ერთდროულად გამოყენებამ, შეიძლება გამოიწვიოს თირკმელების მყარი დაზიანება თირკმელების უკმარისობის განვითარების რისკით (ე.წ. ~ანალგეტიკური~ ნეფროპათია).
ბავშვები და მოზარდები
დიკლობერლი® რეტარდი არ ინიშნება ბავშვებში და 18 წლამდე ასაკის პაციენტებში (იხ. პარაგრაფი 2 “დიკლობერლი® რეტარდის მიღება არ შეიძლება შემდეგ შემთხვევებში:”).
პრეპარატ დიკლობერლი® რეტარდის მიღება სხვა სამკურნალო საშუალებებთან აცნობეთ ექიმს ან ფარმაცევტს თუ იღებთ ან ახლო წარსულში იღებდით, ან შეიძლება მიგეღოთ ნებისმიერი სხვა სამკურნალო საშუალება.
დიგოქსინი, ფენიტოინი, ლითიუმი
დიკლობერლი® რეტარდის და ისეთი პრეპარატების ერთდროულმა მიღებამ,
როგორიცაა დიგოქსინი (გულის მუშაობის გამაძლიერებელი საშუალება), ფენიტოინი (საშუალება კრუნჩხვითი შეტევების მქონე ავადმყოფებისთვის) ან ლითიუმის პრეპარატები (ფსიქიური დაავადებების სამკურნალო საშუალებები), შეიძლება გამოიწვიოს სისხლში აღნიშნული პრეპარატების კონცენტრაციის მომატება. აუცილებელია შრატში ლითიუმის დონის კონტროლი, აგრეთვე რეკომენდებულია შრატში დიგოქსინისა და ფენიტოინის დონის კონტროლი.
დიურეზულები, ბეტა-ბლოკერები, აგფ ინჰიბიტორები და ანგიოტენზინი II
ანტაგონისტები
დიკლობერლი® რეტარდს შეუძლია დაასუსტოს შარდმდენი საშუალებების და
არტერიული წნევის დამაქვეითებელი პრეპარატების (დიურეზულების და ჰიპოტენზიური პრეპარატების, მაგალითად ბეტა-ბლოკერების, აგფ ინჰიბიტორების და ანგიოტენზინი II ანტაგონისტების) მოქმედება. ამიტომ რეკომენდებულია არტერიული წნევის რეგულარული კონტროლი.
დიკლობერლი® რეტარდს შეუძლია შეასუსტოს აგფ ინჰიბიტორების და ანგიოტენზინი II ანტაგონისტების (გულის უკმარისობის და მაღალი არტერიული წნევის სამკურნალო საშუალებები) მოქმედება. თირკმელების დაავადებების დროს
მდგომარეობის გაუარესების რისკი აღნიშნული პრეპარატების ერთდროული მიღების დროს შეიძლება გაიზარდოს. დარწმუნდით, რომ იღებთ საკმარისი რაოდენობის სითხეს, აგრეთვე საჭიროა თირკმელების ფუნქციის მაჩვენებლების რეგულარული კონტროლი – აღნიშნული კონტროლის ჩატარება საჭიროა მკურნალობის დასაწყისში და შემდგომ დროის გარკვეული პერიოდულობით.
დიკლობერლი® რეტარდის და კალიუმის შემანარჩუნებელი დიურეზული საშუალებების (გარკვეული სახეობის დიურეზულების) ერთდროულმა მიღებამ შეიძლება გამოიწვიოს სისხლში კალიუმის დონის გაზრდა. ამის გამო, რეკომენდებულია კალიუმის კონცენტრაციის ხშირი კონტროლი.
სხვა აასს (მათ შორის ასპირინი) და გლუკოკორტიკოიდები
დიკლობერლი® რეტარდის და აასს-ის ჯგუფის სხვა ანთების საწინააღმდეგო და
ტკივილგამაყუჩებელი პრეპარატების ან გლუკოკორტიკოიდების (ანთების საწინააღმდეგო პრეპარატები ან პრეპარატები, რომლებიც გამოიყენება ჩანაცვლებითი ჰორმონალური თერაპიის სახით) ერთდროულად მიღება ზრდის კუჭ- ნაწლავის ტრაქტის წყლულის ან სისხლდენის განვითარების რისკს. დოკლოფენაკის მიღება რეკომენდებული არ არის სხვა აასს-თან ერთად.
სეროტონინის უკუმიტაცების სელექციური ინჰიბიტორები
გარკვეულმა ანტიდეპრესანტებმა (სეროტონინის უკუმიტაცების სელექციური ინჰიბიტორები) შეიძლება გაზარდოს კუჭ-ნაწლავიდან სისხლდენის განვითარების რისკი.
მეტოტრექსატი
მეტოტრექსატის (ზოგიერთი ანთებითი დაავადებების ან კიბოს ზოგიერთი სახეობის სამკურნალო საშუალება) მიღებამდე ან მიღების შემდეგ 24 საათის განმავლობაში დიკლობერლი® რეტარდის მიღებამ შესაძლოა გამოიწვიოს სისხლში მეტოტრექსატის კონცენტრაციის მომატება და გააძლიეროს მისი გვერდითი მოქმედებები.
ციკლოსპორინი
არასტეროიდულმა ანთების საწინააღმდეგო საშუალებებმა (რომლებსაც ეკუთვნის დიკლოფენაკი) შეიძლება გააძლიეროს თირკმელებზე ციკლოსპორინის დამაზიანებელი მოქმედება (ციკლოსპორინი გამოიყენება ტრანსპლანტანტების მოწყვეტის პროფილაქტიკისათვის, და აგრეთვე რევმატული დაავადებების სამკურნალოდ). თქვენ უნდა მიიღოთ დიკლოფენაკის უფრო მცირე დოზა.
ანტიკოაგულანტები და თრომბოციტების აგრეგაციის ინჰიბიტორები არასტეროიდულმა ანთების საწინააღმდეგო საშუალებებმა შეიძლება გააძლიეროს თრომბოციტების აგრეგაციის ინჰიბიტორებისა და ისეთი ანტიკოაგულანტების მოქმედება (გამოიყენება სისხლის შედედების პროფილაქტიკისთვის), როგორიცაა ვარფარინი. საჭიროა უფრო ხშირი ვიზიტები ექიმთან.
პრობენეციდი
პრობენეციდის შემცველ სამკურნალო საშუალებებს (პოდაგრის სამკურნალო საშუალება) შეუძლია შეანელოს დიკლოფენაკის გამოყოფა ორგანიზმიდან. აღნიშნულმა შეიძლება გააძლიეროს დიკლოფენაკის გვერდითი მოქმედებები.
დიაბეტის საწინააღმდეგო საშუალებები
შაქრის დამწევი (დიაბეტის საწინააღმდეგო) საშუალებების მიღებისას არსებობს ცალკეული ცნობები სისხლში გლუკოზის კონცენტრაციის შეცვლის შესახებ დიკლოფენაკის შეყვანის შემდეგ. აღნიშნულთან დაკავშირებით აუცილებელია დიაბეტის საწინააღმდეგო საშუალების დოზის კორექცია. ამიტომ მკურნალობის დროს, სიფრთხილის ზომის სახით, რეკომენდებულია სისხლში შაქრის მაჩვენებლების კონტროლი.
ქინოლონის რიგის ანტიბაქტერიული საშუალებები
არასტეროიდულ ანთების საწინააღმდეგო საშუალებებთან ერთდროულად გამოყენებისას ქინოლონმა (გარკვეული ტიპის ანტიბიოტიკი) შეიძლება გამოიწვიოს კრუნჩხვა.
კოლესტიპოლი და ქოლესტირამინი
მოცემულ საშუალებებს (სისხლში ლიპიდების კონცენტრაციის დამაქვეითებელი პრეპარატები) შეუძლია გაახანგრძლივოს ან დააქვეითოს ორგანიზმში დიკლოფენაკის შეწოვა. ამიტომ დიკლობერლი® რეტარდის მიღება რეკომენდებულია კოლესტიპოლის/ქოლესტირამინის მიღებამდე სულ მცირე 1 საათით ადრე ან მისი მიღებიდან 4-6 საათის შემდეგ.
CYP2C9-ის ძლიერმოქმედი ინჰიბიტორები
დიკლოფენაკთან ერთდროულად გამოყენებისას ვორიკონაზოლმა (მძიმე სოკოვანი ინფექციების სამკურნალო საშუალება) და სულფინპირაზონმა (პოდაგრის სამკურნალო პრეპარატი) შეიძლება გაზარდოს სისხლის პლაზმაში დიკლოფენაკის დონე. ეს შეიძლება გახდეს ორგანიზმში დიკლოფენაკის დაგროვებისა და მისი გვერდითი მოქმედებების გაძლიერების მიზეზი.
პრეპარატ დიკლობერლი® რეტარდის მიღება ალკოჰოლთან ერთად
პრეპარატ დიკლობერლი® რეტარდით მკურნალობის დროს შეძლებისდაგვარად მოერიდეთ ალკოჰოლის მიღებას.
ორსულობა, ძუძუთი კვება და შვილოსნობის ფუნქცია
ორსულობის ან ძუძუთი კვების პერიოდში, აგრეთვე ორსულობაზე ეჭვის ან ორსულობის დაგეგმვის შემთხვევაში მოცემული პრეპარატის მიღებამდე რჩევისათვის მიმართეთ ექიმს ან ფარმაცევტს.
ორსულობა
დიკლობერლი® რეტარდის მიღების დროს ორსულობის დადგენის შემთხვევაში
აცნობეთ ექიმს. ორსულობის პირველი და მეორე ტრიმესტრის განმავლობაში დიკლობერლი® რეტარდის მიღება ნებადართულია მხოლოდ ექიმის კონსულტაციის შემდეგ. დედისთვის და ბავშვისთვის გართულებების მომატებულ რისკთან დაკავშირებით არ შეიძლება დიკლობერლი® რეტარდის მიღება ორსულობის ბოლო ტრიმესტრის განმავლობაში (იხ. პარაგრაფი 2 “დიკლობერლი® რეტარდის მიღება არ შეიძლება შემდეგ შემთხვევებში:”).
ძუძუთი კვების პერიოდი
როგორც სხვა აასს, დიკლოფენაკი უმნიშვნელო რაოდენობით გამოიყოფა დედის რძეში. ამიტომ, ბავშვზე არასასურველი მოქმედების თავიდან აცილების მიზნით ძუძუთი კვების დროს დიკლოფენაკის გამოყენება არ შეიძლება.
შვილოსნობის ფუნქცია
როგორც პროსტაგლანდინების სინთეზის მაინჰიბირებელ სხვა პრეპარატებს, დიკლობერლი® რეტარდს შეუძლია გაართულოს ჩასახვა.
აცნობეთ თქვენს ექიმს თუ თქვენ გეგმავთ ორსულობას ან გაქვთ ბავშვის ჩასახვასთან დაკავშირებული პრობლემები.
ზემოქმედება სატრანსპორტო საშუალებების მართვის და მექანიზმებთან მუშაობის უნარზე
დიკლობერლი® რეტარდის მაღალი დოზებით მიღებისას შეიძლება ადგილი ჰქონდეს
გვერდით მოვლენებს ცენტრალური ნერვული სისტემის მხრივ, მაგალითად, დაღლილობას და თავბრუსხვევას, ამიტომ, ცალკეულ შემთხვევებში შეიძლება შეიცვალოს რეაქცია და შემცირდეს საგზაო მოძრაობაში აქტიური მონაწილეობის და მექანიზმების მართვის უნარი. აღნიშნული დარღვევები განსაკუთრებით გამოხატულია ალკოჰოლთან ერთდროულად მიღებისას. ამ შემთხვევაში თქვენ კარგავთ მოულოდნელ სიტუაციებზე სწრაფი და ზუსტი რეაგირების უნარს. აღნიშნულ შემთხვევებში თქვენთვის არ შეიძლება ავტომობილის ან სხვა
სატრანსპორტო საშუალებების მართვა! თქვენთვის არ შეიძლება მექანიზმებთან ან ხელსაწყოებთან მუშაობა! არ იმუშაოთ დაზღვევის გარეშე!
პრეპარატი დიკლობერლი® რეტარდი შეიცავს საქაროზას
თუ თქვენთვის ცნობილია შაქრის გარკვეული სახეობების მიმართ აუტანლობის შესახებ, მოცემული პრეპარატის მიღების წინ კონსულტაციისთვის მიმართეთ თქვენს ექიმს.
3. დიკლობერლი® რეტარდის მიღების წესი
მოცემული პრეპარატი ყოველთვის მიიღეთ თქვენი ექიმის მითითების ზუსტად დაცვით. პრეპარატის მიღების შესახებ ეჭვის შემთხვევაში, მიმართეთ თქვენს ექიმს ან ფარმაცევტს.
დოზირება
თუ სხვა დანიშნულება არ არის მოცემული ექიმის მიერ, დიკლობერლი® რეტარდი
მიიღება შემდეგი დოზებით:
დიკლოფენაკის დოზა დამოკიდებულია დაავადების სიმძიმეზე. მოზრდილებში დოზის რეკომენდებული ინტერვალი მოიცავს 50-დან 150 მგ-მდე ნატრიუმის დიკლოფენაკს დღე-ღამეში.
მოზრდილებში ჩვეულებრივი დოზა შეადგენს დიკლობერლი® რეტარდის პროლონგირებული მოქმედების 1 კაფსულას დღე-ღამეში (რაც შეესაბამება 100 მგ ნატრიუმის დიკლოფენაკს).
გამოყენების წესი
დიკლობერლი® რეტარდის კაფსულა მიიღება მთლიანად, დაუღეჭავად, დიდი
რაოდენობის სითხის მიყოლებით. თუ თქვენ გაქვთ მგრძნობიარე კუჭი, დიკლობერლი® რეტარდის მიღება რეკომენდებულია საკვების მიღების დროს.
გამოყენების ხანგრძლივობა
პრეპარატ დიკლობერლი® რეტარდით მკურნალობის ხანგრძლივობა განისაზღვრება თქვენი მკურნალი ექიმის მიერ.
რევმატული დაავადებების მკურნალობის შემთხვევაში შეიძლება საჭირო გახდეს პრეპარატის მიღება ხანგრძლივი დროის განმავლობაში.
გვერდითი მოქმედებების მინიმუმამდე დაყვანა შესაძლებელია პრეპარატის უმცირესი ეფექტური დოზის რაც შეიძლება მოკლე დროის განმავლობაში მიღების გზით, რაც აუცილებელია სიმპტომების მოსახსნელად (იხ. ~გაფრთხილება და სიფრთხილის ზომები~).
აცნობეთ ექიმს, თუ ფიქრობთ, რომ პრეპარატ დიკლობერლი® რეტარდის მოქმედება ძალიან ძლიერი ან სუსტია.
თუ თქვენ მიიღეთ პრეპარატ დიკლობერლი® რეტარდის საჭიროზე მეტი დოზა პრეპარატი დიკლობერლი® რეტარდი ყოველთვის მიიღეთ ექიმის მითითების ზუსტად დაცვით ან ჩანართში მოყვანილი პრეპარატის დოზირების შესახებ ინსტრუქციის შესაბამისად. თუ გრძნობთ, რომ ტკივილი სათანადოდ არ შეგიმსუბუქთად, აცნობეთ ექიმს და დამოუკიდებლად არ გაზარდოთ დოზა.
დიკლოფენაკის დოზის გადაჭარბების ტიპიური კლინიკური სურათი არ არის. პრეპარატ დიკლობერლი® რეტარდის დოზის გადაჭარბება შეიძლება გამოიხატოს დარღვევებით ცენტრალური ნერვული სისტემის მხრივ, რომელიც გამოვლინდება თავის ტკივილით, თავბრუსხვევით, გონების დაბინდვით და დაკარგვით (ხოლო ბავშვებში – აგრეთვე მიოკლონური კრუნჩხვებით), ამასთანავე, დოზის გადაჭარბების სიმპტომები შეიძლება იყოს მუცლის ტკივილი, გულისრევა და ღებინება. გარდა ამისა, შესაძლოა განვითარდეს კუჭ-ნაწლავიდან სისხლდენა, აგრეთვე ღვიძლისა და თირკმელების ფუნქციის დარღვევა. ჭარბმა დოზირებამ აგრეთვე შესაძლოა გამოიწვიოს არტერიული წნევის დაცემა, სუნთქვის გაძნელება (ქოშინი) და კანისა და ლორწოვანი გარსების მოლურჯო-მოწითალო შეფერილობა (ციანოზი).
სპეციფიური ანტიდოტი არ არსებობს.
პრეპარატ დიკლობერლი® რეტარდის დოზის გადაჭარბების შესახებ ეჭვის შემთხვევაში მიმართეთ მკურნალ ექიმს, რომელიც მოწამვლის სიმძიმის მიხედვით მიიღებს გადაწყვეტილებას საჭირო ზომების შესახებ.
თუ თქვენ დაგავიწყდათ დიკლობერლი® რეტარდის დოზის მიღება
თუ თქვენ დაგავიწყდათ პრეპარატის დოზის მიღება, შემდეგ მიღებაზე არ მიიღოთ პრეპარატის ჩვეულებრივზე მეტი რაოდენობა.
პრეპარატის გამოყენების შესახებ დამატებითი კითხვების შემთხვევაში მიმართეთ თქვენს ექიმს ან ფარმაცევტს.
4. შესაძლო გვერდითი მოქმედება
როგორც ყველა სამკურნალო საშუალებას, მოცემულ პრეპარატსაც შეიძლება ჰქონდეს გვერდითი მოქმედებები, თუმცა ის არ ვლინდება ყველა პაციენტში.
თუ შენიშნეთ ქვემოთ მოყვანილი გვერდითი მოქმედებების განვითარება, აცნობეთ თქვენს ექიმს, რომელიც მიიღებს გადაწყვეტილებას საჭირო ზომების შესახებ.
გვერდითი მოქმედებების სიხშირის შეფასებას საფუძვლად უდევს შემდეგი მონაცემები:
შესაძლო გვერდითი მოქმედება
რაც შეეხება სამკურნალო საშუალების ქვემოთ ჩამოთვლილ არასასურველ მოვლენებს, გაითვალისწინეთ, რომ ისინი მნიშვნელოვნად დამოკიდებულია დოზაზე და ატარებს ინდივიდუალურ ხასიათს.
ყველაზე ხშირია გვერდითი მოქმედება საჭმლის მომნელებელი ტრაქტის მხრივ. განსაკუთრებით ხანდაზმულ პაციენტებში, შეიძლება ადგილი ჰქონდეს კუჭის/თორმეტგოჯა ნაწლავის წყლულს (პეპტიური წყლული), პერფორაციას ან სისხლდენას, ზოგჯერ ლეტალური შედეგით (იხ. პარაგრაფი 2 “გაფრთხილება და სიფრთხილის ზომები”). არსებობს ცნობები იმის შესახებ, რომ პრეპარატის მიღების შემდეგ გამოვლინდა: გულისრევა, ღებინება, ფაღარათი, შებერილობა, შეკრულობა, ჩივილები საჭმლის მონელებაზე, ტკივილი მუცლის არეში, კუპრისებრი განავალი, სისხლიანი ღებინება, პირის ღრუს ლორწოვანი გარსის წყლულოვანი ანთება (წყლულოვანი სტომატიტი), წყლულოვანი კოლიტისა და კრონის დაავადების დამძიმება (იხ. პარაგრაფი 2 “გაფრთხილება და სიფრთხილის ზომები”).
ცნობილია, აასს მიღებასთან დაკავშირებით, ორგანიზმში სითხის დაგროვების (შეშუპება), არტერიული წნევის მომატების და გულის უკმარისობის შესახებ.
შეიძლება არსებობს კავშირი დიკლობერლი® რეტარდის მსგავსი პრეპარატების გამოყენებასა და არტერიული თრომბოზის, მაგალითად გულის შეტევების (~მიოკარდიუმის ინფარქტის~) ან ინსულტის, განვითარების რისკის მომატებას შორის (იხ. პარაგრაფები “დიკლობერლი® რეტარდის მიღება არ შეიძლება შემდეგ შემთხვევებში:” და ~გაფრთხილება და სიფრთხილის ზომები~).
ხშირად: შეიძლება განვითარდეს 10-დან 1 პაციენტში
- ჩივილები კუჭ-ნაწლავის ტრაქტის მხრივ, მაგალითად, გულისრევა, ღებინება და ფაღარათი, აგრეთვე კუჭ-ნაწლავის ტრაქტიდან უმნიშვნელო სისხლდენა, რომელმაც, ცალკეულ შემთხვევაში, შეიძლება გამოიწვიოს სისხლის წითელი სხეულების რაოდენობის შემცირება (ანემია);
- ჰიპერმგრძნობელობის ისეთი რეაქციები, როგორიცაა კანზე გამონაყარი და კანის ქავილი;
- დარღვევები ცენტრალური ნერვული სისტემის მხრივ, როგორიცაა თავის ტკივილი, თავბრუსხვევა, მოუსვენრობა (აგზნება), გაღიზიანებადობა ან დაღლილობა;
- საჭმლის მონელების დარღვევა (დისპეფსია), შებერილობა (მეტეორიზმი), სპაზმები მუცლის ღრუში (ტკივილი მუცლის არეში), უმადობა, და აგრეთვე კუჭ-ნაწლავის წყლულები (ზოგჯერ სისხლდენით და პერფორაციით);
- სისხლში ღვიძლის ფერმენტების დონის მომატება;
- ვერტიგო.
ზოგჯერ: შეიძლება განვითარდეს 100-დან 1 პაციენტში
- ჭინჭრის ციება
ასეთ შემთხვევაში დაუყოვნებლივ შეწყვიტეთ მოცემული პრეპარატის გამოყენება და მიმართეთ ექიმს;
- სისხლიანი ღებინება (ჰემატომეზისი), სისხლიანი განავალი ან სისხლიანი ფაღარათი;
- ღვიძლის დაზიანება (განსაკუთრებით, ხანგრძლივი მკურნალობის დროს), ღვიძლის ანთება (ჰეპატიტი) სიყვითლით ან მის გარეშე, ცალკეულ შემთხვევაში ძალიან მძიმე [ელვისებური] მიმდინარეობით წინასწარი სიმპტომების გარეშეც);
- თმის ცვენა;
- შეშუპება (ორგანიზმში სითხის შეკავება), განსაკუთრებით პაციენტებში მაღალი არტერიული წნევით ან თირკმელების დარღვეული ფუნქციით.
იშვიათად: შეიძლება განვითარდეს 1000-დან 1 პაციენტში
- მომატებული მგრძნობელობის რეაქციები, ანაფილაქსიური და ანაფილაქტოიდური რეაქციები (შეიძლება გამოვლინდეს სასუნთქი გზების შევიწროებით, ქოშინით (რესპირატორული დისტრესი), ტაქიკარდიის, არტერიული წნევის დაცემის (ჰიპოტონია) და შოკის სახით;
- კუჭის ლორწოვანი გარსის ანთება (გასტრიტი), სისხლდენა კუჭ-ნაწლავის ტრაქტიდან;
- ღვიძლის ფუნქციის დარღვევა.
ძალიან იშვიათად: შეიძლება განვითარდეს 10000-დან 1 პაციენტში
- დროებითი ურთიერთკავშირის დროს, გარკვეული ანთების საწინააღმდეგო საშუალებების გამოყენებით (არასტეროიდულ ანთების საწინააღმდეგო პრეპარატების, რომლებსაც აგრეთვე მიეკუთვნება დიკლობერლი® რეტარდი) - აღწერილია ინფექციური ანთებითი პროცესების გაღრმავების შემთხვევები (მაგალითად, მანეკროზებელი ფასციიტის განვითარება).
დიკლობერლი® რეტარდით მკურნალობის დროს ინფექციური დაავადებების
გამოვლენის ან ინფექციის სიმპტომების გაღრმავების შემთხვევაში (მაგალითად, გაწითლება, შეშუპება, ტემპერატურის ადგილობრივი მომატება, ტკივილი, ცხელება) დაუყოვნებლივ მიმართეთ ექიმს, რომელიც განსაზღვრავს ინფექციის საწინააღმდეგო თერაპიის ან ანტიბიოტიკებით მკურნალობის აუცილებლობას.
- დიკლოფენაკის გამოყენების დროს აღინიშნებოდა ტვინის გარსების ანთების სიმპტომატიკა (ასეპტიური მენინგიტი), რომელიც მოიცავს ძლიერ თავის ტკივილს, გულისრევას, ღებინებას, ცხელებას, კეფის კუნთების რიგიდობას ან ცნობიერების დაბინდვას. როგორც ჩანს, გარკვეული აუტოიმუნური დაავადებების მქონე პაციენტები (სისტემური წითელი მგლურა, კომბინირებული კოლაგენოზები) წარმოადგენენ რისკის ჯგუფს.
- სისხლმბადი სისტემის ფუნქციის დარღვევა (ანემია, ლეიკოპენია, თრომბოციტოპენია, პანციტოპენია, აგრანულოციტოზი), ჰემოლიზური და აპლასტიური ანემია (სისხლის ნაკლებობა სისხლის წითელი სხეულების გაძლიერებული დაშლის გამო).
აღნიშნული მდგომარეობების პირველი ნიშნები შეიძლება იყოს: ცხელება, ყელის ტკივილი, ეროზია პირის ღრუში, გრიპოზული მდგომარეობა, გამოხატული დაღლილობა, სისხლდენა ცხვირიდან, სისხლჩაქცევები კანში.
ასეთ შემთხვევაში დაუყოვნებლივ შეწყვიტეთ პრეპარატის შეყვანა და მიმართეთ ექიმს. ტკივილგამაყუჩებელი ან სიცხის დამწევი პრეპარატებით თვითმკურნალობა უკუნაჩვენებია.
ხანგრძლივი თერაპიის დროს საჭიროა სისხლის სურათის რეგულარული კონტროლი.
- ანგიონევროზული შეშუპება (სახის, ენის ან ხმის აპარატის შესიება)
რომელიმე ზემოთმოყვანილი სიმპტომის განვითარების შემთხვევაში, რომელიც შეიძლება გამოვლინდეს პრეპარატის პირველივე გამოყენებისას, შეწყვიტეთ დიკლოფენაკის მიღება და დაუყოვნებლივ მიმართეთ სამედიცინო დახმარებისთვის.
- სისხლძარღვების (ვასკულიტი) და ფილტვების (პნევმონიტი) ალერგიული ხასიათის ანთება;
- ფსიქოზური რეაქციები, დეპრესია, შიშის გრძნობა, უძილობა, კოშმარული სიზმრები;
- მგრძნობელობის, გემოს აღქმის, მეხსიერების დარღვევა, დეზორიენტაცია, კრუნჩხვა, კანკალი, ინსულტი (ტვინში სისხლის მიმოქცევის დარღვევა);
- მხედველობის დარღვევა (არამკვეთრი მხედველობა და მხედველობის გაორება);
- ხმაური ყურებში, სმენის დარღვევა;
- გულისცემა, ტკივილი გულ-მკერდის არეში, გულის კუნთის სისუსტე (გულის უკმარისობა), გულის შეტევა (მიოკარდიუმის ინფარქტი);
- მაღალი არტერიული წნევა (ჰიპერტენზია);
- ასთმა სუნთქვის გაძნელებით (ქოშინი);
- პირის ლორწოვანი გარსის ანთება (სტომატიტი), მათ შორის წყლულებით (წყლულოვანი სტომატიტი), ენის ანთება, საყლაპავის დაზიანება, შეკრულობა, აგრეთვე პათოლოგია მუცლის ქვედა მიდამოების მხრივ, მაგალითად, მსხვილი ნაწლავის ანთება (კოლიტი), მათ შორის, მსხვილი ნაწლავის ანთება სისხლდენის თანხლებით ან კრონის დაავადების ან არასპეციფიური წყლულოვანი კოლიტის გამწვავება (მსხვილი ნაწლავის გარკვეული ანთებითი დაავადებები წყლულების თანხლებით), კუჭქვეშა ჯირკვლის ანთება (პანკრეატიტი), ნაწლავის სანათურის შევიწროება.
მუცლის ზედა არეში ძლიერი ტკივილის, სისხლიანი ღებინების, განავალში სისხლის და შავი განავლის გამოვლენის შემთხვევაში შეწყვიტეთ პრეპარატ დიკლობერლი® რეტარდის მიღება და დაუყოვნებლივ მიმართეთ ექიმს.
- ღვიძლის ნეკროზი, ღვიძლის უკმარისობა
ამიტომ, ხანგრძლივი მკურნალობის დროს რეკომენდებულია ღვიძლის მაჩვენებლების რეგულარული კონტროლი.
- ისეთი მძიმე რეაქციები კანის მხრივ, როგორიცაა კანზე გამონაყარი გაწითლებით (ეგზანთემა, ეგზემა, ერითემა, პოლიმორფული ერითემა) და ბუშტუკების წარმოქმნით (მაგალითად, სტივენს-ჯონსონის სინდრომი, ტოქსიური ეპიდერმული ნეკროლიზი/ლაიელის სინდრომი) ან აქერცვლა (ექსფოლიაციური დერმატიტი); მომატებული მგრძნობელობა მზის სხივების მიმართ (ფოტომგრძნობელობის რეაქციები), წვრილი სისხლჩაქცევები კანში (პურპურა), რაც ასევე შეიძლება იყოს ალერგიული რეაქცია.
- თირკმლის ქსოვილის დაზიანება (ინტერსტიციული ნეფრიტი, დვრილების ნეკროზი), რომელსაც შეიძლება თან ახლდეს თირკმელების ფუნქციის მწვავე დარღვევების (თირკმელების უკმარისობა) განვითარება, შარდში ცილები (პროტეინურია) ან/და სისხლი (ჰემატურია); ნეფროზული სინდრომი (შეშუპება და შარდით ცილების მნიშვნელოვანი გამოყოფა).
აუცილებელია თირკმელების ფუნქციის რეგულარულად შემოწმება.
შარდის გამოყოფის შემცირება, ორგანიზმში სითხის შეკავება (შეშუპება) და ზოგადად ცუდი გუნება-განწყობა შეიძლება იყოს თირკმელების ფუნქციის დარღვევების ნიშნები თირკმელების უკმარისობამდე.
აღნიშნული სიმპტომების გამოვლენის ან გაღრმავების შემთხვევაში უნდა შეწყვიტოთ დიკლოფენაკის მიღება და დაუყოვნებლივ მიმართოთ ექიმს.
გარკვეული გვერდითი მოქმედებების გამოვლენის შემთხვევაში დაიცავით ზემოთ აღნიშნული მითითებები.
შეტყობინება გვერდითი მოქმედებების შესახებ
რომელიმე გვერდითი მოქმედების გამოვლენის შემთხვევაში აცნობეთ თქვენს ექიმს ან ფარმაცევტს. ეს ეხება ყველა გვერდით მოქმედებას, რომელიც არ არის მითითებული მოცემულ ჩანართში.
აგრეთვე, გვერდითი მოქმედებების შესახებ ინფორმაციის გაგზავნა შეიძლება პირდაპირ შეტყობინებების ეროვნული სისტემის მეშვეობით, რომელიც მითითებულია დანართში V.
გვერდითი მოქმედებების შესახებ ინფორმაციის გაგზავნით თქვენ დაგვეხმარებით
მოცემული სამკურნალო საშუალების შესახებ მეტი ინფორმაციის მიღებაში.
5. პრეპარატ დიკლობერლი® რეტარდის შენახვის პირობები
მოცემული პრეპარატი შეინახეთ ბავშვებისათვის მიუწვდომელ ადგილას.
მოცემული სამკურნალო საშუალება არ გამოიყენება ვარგისობის ვადის გასვლის შემდეგ, რომელიც მითითებულია ბლისტერსა და დასაკეც მუყაოს კოლოფზე წარწერა ~ვარგისია~-ს შემდეგ. ვარგისობის ვადის გასვლის თარიღი გულისხმობს მითითებული თვის ბოლო დღეს.
ვარგისობის ვადა შეადგენს 36 თვეს.
შენახვის პიროებები
პრეპარატი ინახება არა უმეტეს 25˚C ტემპერატურაზე.
ტენიანობისგან დაცვის მიზნით პრეპარატი ინახება ორიგინალ შეფუთვაში. პრეპარატების კანალიზაციის მილში ან ნაგავთან გადაგდება არ შეიძლება. ამ საკითხთან დაკავშირებით მიმართეთ ფარმაცევტს. აღნიშნული ზომები ხელს შეუწყობს გარემოს დაცვას.
6. შეფუთვის შემადგენლობა და დამატებითი ინფორმაცია
პრეპარატ დიკლობერლი® რეტარდის შემადგენლობა
მოქმედი ნივთიერება: ნატრიუმის დიკლოფენაკი.
პროლონგირებული მოქმედების თითო კაფსულა შეიცავს 100 მგ ნატრიუმის დიკლოფენაკს.
სხვა კომპონენტები: საქაროზა, სიმინდის სახამებელი, შელაკი, ტალკი, Eუდრაგიტ ღL PO (ამონიუმის მეტაკრილატის სოპოლიმერი, ტიპი A), ნატრიუმის ჰიდროქსიდი, ჟელატინი, ტიტანის დიოქსიდი (E171).
პრეპარატ დიკლობერლი® რეტარდის აღწერა და შეფუთვის შემადგენლობა
თეთრიდან კრემისფერამდე შეფერილობის, მკვრივი ჟელატინის კაფსულები ბლისტერში. პირველადი შეფუთვა შედგება თეთრი პპ-ცოს-პპ-ფირფიტის და მასთან შედუღებული ალუმინის ფოლგისგან.
ორიგინალ შეფუთვაში მოთავსებულია 20 პროლონგირებული მოქმედების კაფსულა.
გაცემის პირობები
ფარმაცევტული პროდუქტის ჯგუფი III, გაიცემა რეცეპტის გარეშე.
სად შევიძინოთ?