ლორანექსი / Loranex
- საერთაშორისო დასახელება (აქტიური ნივთიერება): desloratadine
- კლინიკურ-ფარმაკოლოგიური ჯგუფი: ალერგოლოგია → ჰისტამინური H1 რეცეპტორების ბლოკატორები → სისტემური მოქმედების მედიკამენტები → მეორე თაობის პრეპარატები
- მწარმოებელი კომპანია: ჯი-ემ-პი
- მწარმოებელი ქვეყანა: საქართველო
- გამოშვების ფორმა: 5მგ ტაბლეტი №10
- გაცემის რეჟიმი: III ჯგუფი (ურეცეპტოდ)
შემადგენლობა
ლორანექსის გარსით დაფარული ერთი ტაბლეტი შეიცავს აქტიური ნივთიერების - დესლორატადინის 5 მგ-ს.
დამხმარე ნივთიერებები: მიკროკრისტალური ცელულოზა, კალციუმის ჰიდროფოსფატი, ნატრიუმის სახამებლის გლიკოლატი, ლს-ჰიდროქსიპროპილცელულოზა, მაგნიუმის სტეარატი, შემოსაგარსი ფხვნილი.
ფარმაკოლოგიური თვისებები
ხანგრძლივი მოქმედების ანტიჰისტამინური პრეპარატი, პერიფერიული H1-ჰისტამინორეცეპტორების ბლოკატორი. დესლორატადინი წარმოადგენს ლორატადინის აქტიურ მეტაბოლიტს. ხელს უშლის ალერგიული რეაქციის განვითარებას და ამსუბუქებს მის მიმდინარეობას, ახასითებს ქავილის საწინააღმდეგო და ანტიექსუდაციური მოქმედება, ამცირებს კაპილარების გამტარობას, ხელს უშლის ქსოვილების შეშუპებას და გლუვკუნთოვანი სპაზმის განვითარებას. არ მოქმედებს ცენტრალურ ნერვულ სისტემაზე, არ ახასიათებს სედატიური მოქმედება (არ იწვევს ძილიანობას), არ მოქმედებს ფსიქომოტორული რეაქციების სისწრაფეზე. არ იწვევს ელექტროკარდიოგრამაზე QT ინტერვალის გახანგრძლივებას.
ლორანექსი აინჰიბირებს ორგანიზმში მიმდინარე სხვადასხვა რეაქციას, რომლებიც საფუძვლად უდევს ალერგიული ანთებითი პროცესის განვითარებას, კერძოდ: პროანთებითი ციტოკინების გამოყოფა (მათ შორის ინტერლეიკინ-4, ილ-6, ილ-8, ილ-13), პროანთებითი ქემოკინების გამოყოფა, აქტივირებული პოლიმორფულ-ბირთვული ნეიტროფილების მიერ სუპეროქსიდური ანიონების პროდუქცია, ეოზინოფილების ქემოტაქსისი და ადჰეზია, ადჰეზიის მოლეკულების ექსპრესია (P- სელექტინი და სხვა), ჰისტამინის, პროსტაგლანდინ D2-ის და ლეიკოტრინ C4- ის იმუნოგლობულინ E- დამოკიდებული გამოყოფა. ლორანექსი მოქმედებას იწყებს მიღებიდან დაახლოებით 30 წუთში და ახასიათებს ხანგრძლივი (არანაკლებ 24 საათიანი) ანტიალერგიული და ანთების საწინააღმდეგო მოქმედება.
ფარმაკოკინეტიკა
პერორალურად მიღებული დესლორატადინი კარგად შეიწოვება კუჭ-ნაწლავის ტრაქტიდან. 30 წუთში შესაძლებელია მისი განსაზღვრა სისხლის პლაზმაში, ხოლო Cmax მიიღწევა 3 საათში.
პლაზმის ცილებს უკავშირდება 83-87%. საკვები გავლენას არ ახდენს ორგანიზმში მის გადანაწილებაზე. არ გადის ჰემატოენცეფალურ ბარიერს. ჰიდროქსილირების გზით განიცდის ბიოტრანსფორმაციას, გლუკურონიდთან შეკავშირებული მეტაბოლიტის წარმოქმნამდე.
ორგანიზმიდან ძირითადად გამოიდევნება გლუკურონიდთან შეკავშირებული მეტაბოლიტის სახით, ხოლო მცირე რაოდენობა უცვლელი სახით. T1/2 საშუალოდ 27 საათია (20-30 სთ).
ჩვენებები
- სეზონური ან ქრონიკული (მთელი წლის განმავლობაში მიმდინარე) ალერგიული რინიტი (ცემინების, “ცხვირის გაჭედვის”, ცხვირიდან გამონადენის, ცხვირის ქავილის, სასის ქავილის, თვალების სიწითლის და ქავილის შემსუბუქება ან გაქრობა);
- ქრონიკული იდიოპათიური ჭინჭრის ციება (ქავილის, გამონაყარის შემცირება ან გაქრობა).
მიღების წესები და დოზები
ტაბლეტები ინიშნება შიგნით მისაღებად, სასურველია ერთსა და იმავე დროს, მცირე რაოდენობის წყალთან ერთად, საკვებისგან დამოუკიდებლად.
მოზრდილებში და 12 წელზე მეტი ასაკის მოზარდებში - 5 მგ ერთხელ დღეში;
6-12 წლამდე ასაკის ბავშვებში - 2,5 მგ ერთხელ დღეში;
1-6 წლამდე ასაკის ბავშვებში - 1,25 მგ ერთხელ დღეში.
გვერდითი მოვლენები
დესლორატადინის კლინიკური მნიშვნელობის გვერდითი მოვლენები გამოვლენილი არ არის.
შესაძლებელია: დაღლილობის შეგრძნება, პირის სიმშრალე, თავის ტკივილი.
ძალიან იშვიათად - ტაქიკარდია, გულისცემის შეგრძნება, ღვიძლის ფერმენტების აქტივობის მატება, ბილირუბინის კონცენტრაციის მატება, ალერგიული რეაქციები, გამონაყარი.
უკუჩვენება
- პრეპარატის კომპონენტებისადმი მომატებული მგრძნობელობა;
- ლაქტაციის პერიოდი;
- ორსულობა;
- 1 წლამდე ასაკის ბავშვები.
სიფრთხილით ინიშნება თირკმლის უკმარისობის მძიმე ფორმის დროს.
უსაფრთხოების ზომები
დესლორატადინის ეფექტურობა და უსაფრთხოება 1 წლამდე ასაკის ბავშვებში დადგენილი არ არის.
სიფრთხილით ინიშნება პაციენტებში მძიმე ფორმის თირკმლის უკმარისობით.
ორსულობა და ლაქტაცია
ორსულობის პერიოდში დესლორატადინის უსაფრთხოება შესწავლილი არ არის, ამიტომ მისი მიღება არ არის რეკომენდებული.
დესლორატადინი გადადის დედის რძეში, ამიტომ მისი მიღება ლაქტაციის პერიოდში არ არის რეკომენდებული.
განსაკუთრებული მითითებები
ავტომობილისა და სხვა მექანიკური საშუალებების მართვაზე გავლენა
რეკომენდებული დოზით დესლორატადინის ზემოქმედება ავტომობილისა და სხვა მექანიკური საშუალებების მართვის შესაძლებლობაზე გამოვლენილი არ არის.
ჭარბი დოზირება
სიმპტომები: დესლორატადინის რეკომენდებულ 5 მგ დოზაზე ხუთჯერ მეტი დოზის მიღებისას, არ გამოვლენილა რაიმე სიმპტომები.
ასევე, არ გამოვლენილა გულ-სისხლძარღვთა სისტემის კლინიკური მნიშვნელობის დარღვევები დესლორატადინის 20 მგ/დღეში 14 დღის მანძილზე მიღებისას, ხოლო 45 მგ/დღეში 10 დღის მანძილზე მიღებისას არ დაფიქსირებულა QT ინტერვალის გახანგრძლივება ან სხვა სერიოზული გვერდითი მოვლენა.
მკურნალობა: შემთხვევით დიდი დოზის მიღებისას - კუჭის ამორეცხვა,
აქტივირებული ნახშირის მიღება; საჭიროებისას ტარდება სიმპტომური მკურნალობა.
ჰემოდიალიზი არაეფექტურია, პერიტონეალური დიალიზის ეფექტურობა დადგენილი არ არის.
სხვა წამლებთან ურთიერთქმედება
სხვა სამკურნალო საშუალებებთან კლინიკური მნიშვნელობის ურთიერთქმედება გამოვლენილი არ არის.
დესლორატადინი არ აძლიერებს ცნს-ზე ეთანოლის გავლენას.
საკვების მიღება გავლენას არ ახდენს პრეპარატის ეფექტურობაზე.
შენახვის პირობები და ვადები
პრეპარატის ვარგისობის ვადა - 2 წელი.
ინახება 15-25oC ტემპერატურაზე.
ინახება ბავშვებისათვის ხელმიუწვდომელ ადგილზე!
აფთიაქში გაცემის წესი
ფარმაცევტული პროდუქტის ჯგუფი III (გამოყენება შესაძლებელია ექიმის დანიშნულების გარეშე).
სად შევიძინოთ?