Plasmon

1. ტრიფასი® 20-ის აღწერა და გამოყენება 

პრეპარატ ტრიფასი® 20-ის მოქმედ ნივთიერებას წარმოადგენს ტორასემიდი, რომელიც მიეკუთვნება ეგრედ წოდებული მარყუჟოვანი დიურეზულების ჯგუფს.

ტორასემიდს აქვს შარდმდენი მოქმედება, ასევე ამცირებს არტერიულ წნევას.

 

ტრიფასი® 20 გამოიყენება მოზრდილებში სამკურნალოდ:

• სითხის შეკავებისას ქსოვილებში (შეშუპება) და/ან 

• სითხის შეკავებისას სხეულის ღრუებში (ექსუდატი), 

რაც დაკავშირებულია გულის ფუნქციის დარღვევასთან (მაგალითად, ფილტვების შეშუპება გულის მწვავე უკმარისობისას), თუ საჭიროა პრეპარატის ინტრავენური შეყვანა. 

 

2. რა უნდა იცოდეთ პრეპარატ ტრიფასი® 20-ის გამოყენებამდე

ტრიფასი® 20-ის გამოყენება არ შეიძლება, თუ თქვენ: 

• გაქვთ ალერგია 

- მოქმედ ნივთიერება ტორასემიდზე

- ტორასემიდის მსგავსი ქიმიური სტრუქტურის მქონე ნივთიერებებზე (სულფონილშარდოვანას წარმოებულები)

- მოცემული სამკურნალო საშუალების ნებისმიერ სხვა კომპონენტზე (ჩამოთვლილია მე-6 პარაგრაფში)

- გაქვთ თირკმლის უკმარისობა შარდის გამომუშავების შეწყვეტით (ანურია)

- გაქვთ ღვიძლის ფუნქციის მძიმე დარღვევა ცნობიერების არევით (ღვიძლის კომა ან ღვიძლის პრეკომა)

- გაქვთ დაბალი არტერიული წნევა (ჰიპოტონია)

- გაქვთ სისხლის მოცულობის შემცირება (ჰიპოვოლემია)

- გაქვთ ნატრიუმის ან კალიუმის დეფიციტი (ჰიპონატრიემია, ჰიპოკალიემია)

- ადგილი აქვს ისეთი მნიშვნელოვანი ფაქტორების არსებობას, რომლებიც ხელს უშლის შარდის გადინებას (მაგალითად, წინამდებარე ჯირკვლის მნიშვნელოვანი გადიდება)

- ძუძუთი კვების დროს

 

გაფრთხილება და სიფრთხილის ზომები

პრეპარატ ტრიფასი® 20-ის გამოყენებამდე კონსულტაციისთვის მიმართეთ ექიმს ან ფარმაცევტს. 

 

ზოგიერთი მდგომარეობის დროს პრეპარატ ტრიფასი® 20-ის გამოყენების გამოცდილება არასაკმარისია. ამიტომ ტრიფასი® 20-ის გამოყენება რეკომენდებული არ არის შემდეგ შემთხვევებში: 

- პოდაგრა

- გულის რიტმის მძიმე დარღვევები, განსაკუთრებით მისი პათოლოგიური შენელება (გულის კუნთში აგზნების ფორმირებისა და გამტარობის დარღვევა, მაგალითად სინოატრიალური ბლოკადის, მე-2 ან მე-3 ხარისხის AV-ბლოკადის დროს).

- მჟავა-ტუტოვანი ბალანსის პათოლოგიური ცვლილებები ორგანიზმში.

- ლითიუმის პრეპარატებით ერთდროული მკურნალობა (გამოიყენება გუნება-განწყობის დარღვევებისა და ზოგიერთი სახის დეპრესიის დროს). 

- ზოგიერთი ანტიბიოტიკით (ამინოგლიკოზიდები, ცეფალოსპორინები) ერთდროულად მკურნალობა ინფექციური დაავადებების დროს.

- სისხლის შემადგენლობის პათოლოგიური ცვლილებები (მაგალითად, სისხლის შედედების უზრუნველმყოფელი თრომბოციტების ან ერითროციტების რაოდენობის შემცირება თირკმლის ნორმალური ფუნქციის მქონე პაციენტებში). 

- თირკმელების ფუნქციის დარღვევები, გამოწვეული მათთვის ტოქსიკურ ნივთიერებებთან კონტაქტით. 

 

ბავშვები და 18 წლამდე ასაკის მოზარდები

ბავშვებსა და 18 წლამდე ასაკის მოზარდებში პრეპარატ ტრიფასი® 20-ით მკურნალობის გამოცდილება არ არის, ამიტომ მათთვის არ შეიძლება ამ პრეპარატის გამოყენება. 

 

ზემოქმედება დოპინგ-ტესტების შედეგებზე და არასათანადო გამოყენება დოპინგის სახით 

პრეპარატ ტრიფასი® 20-ის გამოყენებამ შესაძლოა, გამოიწვიოს დოპინგ ტესტების დადებითი შედეგის პროვოცირება. 

პრეპარატ ტრიფასი® 20-ის დოპინგის სახით არასათანადო გამოყენების შედეგების წინასწარ განსაზღვრა შეუძლებელია; ამ შემთხვევაში პრეპარატის გამოყენება შესაძლოა, მავნე იყოს ჯანმრთელობისთვის. 

 

ტრიფასი® 20 და სხვა სამკურნალო საშუალებები

თუ იღებთ/იყენებთ, ახლო წარსულში იღებდით/იყენებდით ან შეიძლება მიგეღოთ/გამოგეყენებინათ ნებისმიერი სხვა სამკურნალო საშუალება, აცნობეთ ამის შესახებ თქვენს ექიმს ან ფარმაცევტს. 

 

• ტრიფასი® 20-ს შეუძლია გავლენა მოახდინოს შემდეგი პრეპარატების მოქმედებაზე

- არტერიული წნევის დამაქვეითებელი პრეპარატები, განსაკუთრებით აგფ ინჰიბიტორები. 

თუ თქვენ იღებთ აგფ ინჰიბიტორებს დამატებით ან უშუალოდ პრეპარატ ტრიფასი® 20-ით მკურნალობის შემდეგ, არტერიული წნევის დაქვეითება შესაძლოა, იყოს ძლიერი. 

- თეოფილინი (ბრონქული ასთმის სამკურნალო პრეპარატი): ტრიფასი® 20-ს შეუძლია გააძლიეროს ამ სამკურნალო საშუალებების მოქმედება. 

- კურარეს მსგავსი პრეპარატები: კუნთებზე მომადუნებელი მოქმედების გაძლიერება

- დიაბეტის საწინააღმდეგო პრეპარატები (გამოიყენება შაქრიანი დიაბეტის სამკურნალოდ): ტრიფასი® 20-ს შეუძლია შეასუსტოს ამ სამკურნალო საშუალებების მოქმედება. 

- ტკივილგამაყუჩებელი საშუალებები და რევმატიზმის სამკურნალო პრეპარატები: ტკივილგამაყუჩებელი საშუალებების მაღალი დოზებისა და სალიცილატების ჯგუფის რევმატიზმის სამკურნალო საშუალებების კომბინირებისას შესაძლებელია მათი მოქმედების გაძლიერება ცენტრალურ ნერვულ სისტემაზე.  

- სისხლის მიმოქცევის დარღვევების, მათ შორის შოკის, სამკურნალო პრეპარატები (მაგალითად, ეპინეფრინი და ნორეპინეფრინი): ამ სამკურნალო საშუალებების მოქმედება შეიძლება შესუსტდეს პრეპარატ ტრიფასი® 20-ის მიღებისას.

 

• პრეპარატ ტრიფასი® 20-ის მოქმედება შეუძლია შეცვალოს შემდეგმა პრეპარატებმა: 

- პრობენეციდი (პოდაგრის სამკურნალო პრეპარატი): შეუძლია შეასუსტოს პრეპარატ ტრიფასი® 20-ის შარდმდენი და ჰიპოტენზიური მოქმედება. 

- ზოგიერთი ანთების საწინააღმდეგი საშუალება (მაგალითად, ინდომეტაცინი, აცეტილსალიცილის მჟავა): მოცემულ სამკურნალო საშუალებებს შეუძლია შეასუსტოს პრეპარატ ტრიფასი® 20-ის შარდმდენი და ჰიპოტენზიური მოქმედება. 

 

• ტრიფასი® 20-მა შესაძლოა გამოიწვიოს შემდეგი გვერდითი მოქმედების გაღრმავების პროვოცირება, განსაკუთრებით, მაღალი დოზების მიღებისას (იხ. პარაგრაფი 3) 

- ამინოგლიკოზიდების ჯგუფის ანტიბიოტიკების (მაგალითად, კანამიცინის, გენტამიცინის, ტობრამიცინის) დამაზინებელი მოქმედება სმენის ორგანოსა და თირკმელებზე.

- სმენისა და თირკმელების ფუნქციის დარღვევა ცისპლატინის შემცველი პრეპარატების (მოქმედი ნივთიერება ავთვისებიანი ახალწარმონაქმნების სამკურნალოდ) გამოყენებისას. 

- თირკმელების დაზიანება ეგრედ წოდებული ცეფალოსპორინების (მოქმედი ნივთიერებები ანტიბიოტიკების ჯგუფიდან) გამოყენებისას ინფექციური დაავადებების სამკურნალოდ. 

 

• პრეპარატ ტრიფასი® 20-ის გამოყენებისას სხვა სამკურნალო საშუალებებთან ერთად შესაძლებელია შემდეგი სახის ურთიერთქმედებები  

- კალიუმის დეფიციტი, გამოწვეული პრეპარატ ტრიფასი® 20-ის გამოყენებით, შეიძლება იწვევდეს საგულე გლიკოზიდების (პრეპარატები, რომლებიც გამოიყენება გულის კუნთის სისუსტის დროს) გვერდითი მოქმედების განვითარებას ან აღრმავებდეს მათ სიმძიმეს, ერთდროულად გამოყენებისას. 

- კალიუმის დეფიციტის გაღრმავება საფაღარათო საშუალებებთან ერთდროული გამოყენებისას. 

- კალიუმის დეფიციტის გაღრმავება თირკმელზედა ჯირკვლის ჰორმონებთან (მინერალკორტიკოიდებთან და გლუკოკორტიკოიდებთან, მაგალითად კორტიზონთან) ერთდროული გამოყენებისას. 

- ლითიუმის პრეპარატების (გამოიყენება გუნება-განწყობის დარღვევებისას და ზოგიერთი სახის დეპრესიის დროს) გულსა და თირკმელებზე ტოქსიკური ზემოქმედების გაძლიერება. პრეპარატ ტრიფასი® 20-ისა და ლითიუმის პრეპარატების ერთდროულად მიღებისას შეიძლება გაიზარდოს სისხლში ლითიუმის კონცენტრაცია. 

 

ორსულობა და ძუძუთი კვება    

ორსულობის ან ძუძუთი კვების პერიოდში, ასევე ორსულობაზე ეჭვის ან ორსულობის დაგეგმვის შემთხვევაში მოცემული პრეპარატის მიღებამდე კონსულტაციისთვის მიმართეთ ექიმს ან ფარმაცევტს. 

 

ორსულობა

პრეპარატ ტრიფასი® 20-ის გამოყენება ორსულობის დროს შესაძლებელია მხოლოდ მკურნალი ექიმის დანიშნულებით. ორსულებს პრეპარატი ენიშნებათ მინიმალური დოზით. 

პრეპარატ ტრიფასი® 20-ის ნაყოფზე ზემოქმედება დადგენილი არ არის. 

 

ძუძუთი კვების პერიოდი

ცნობილი არ არის, გამოიყოფა თუ არა პრეპარატ ტრიფასი® 20-ის მოქმედი ნივთიერება დედის რძეში. ამიტომ, ამ პრეპარატის გამოყენება ძუძუთი კვების პერიოდში არ არის რეკომენდებული. ლაქტაციის დროს პრეპარატ ტრიფასი® 20-ით მკურნალობის აუცილებლობის შემთხვევაში საჭიროა ძუძუთი კვებაზე უარის თქმა. 

 

ზემოქმედება სატრანსპორტო საშუალებების მართვისა და მექანიზმებთან მუშაობის უნარზე 

ტრიფასი® 20-ს შეუძლია შეცვალოს რეაქციის სიჩქარე. ტრიფასი® 20 შესაძლოა არღვევდეს სატრანსპორტო საშუალებების მართვის, მექანიზმებთან მუშაობის ან არამყარი წონასწორობის პირობებში მუშაობის უნარს. 

ყველაზე ხშირად ეს აღინიშნება: 

• მკურნალობის დასაწყისში;

• პრეპარატის დოზის გაზრდისას; 

• პრეპარატის შეცვლისას;

• დამატებითი პრეპარატების დანიშვნისას. 

ალკოჰოლს შეუძლია გააძლიეროს ეს ეფექტები. ამიტომ, ალკოჰოლის მოხმარება პრეპარატ ტრიფასი® 20-ის მიღების დროს არ არის რეკომენდებული. 

 

3. პრეპარატ ტრიფასი® 20-ის მიღების წესი 

მოცემული პრეპარატი ყოველთვის მიიღეთ მკურნალი ექიმის ან ფარმაცევტის რეკომენდაციების შესაბამისად. პრეპარატის მიღების საკითხთან დაკავშირებით რაიმე ეჭვის შემთხვევაში მიმართეთ მკურნალ ექიმს ან ფარმაცევტს. 

 

დოზირება

პრეპარატის დოზა შეირჩევა თირკმელების ფუნქციის დარღვევის ხარისხის მიხედვით. 

 

რეკომენდებული საწყისი დოზა – პრეპარატ ტრიფასი® 20-ის 2 მლ ერთხელ დღე-ღამეში (შეესაბამება 10 მგ ტორასემიდს). 2 მლ-ის აღების შემდეგ ამპულაში დარჩენილი პრეპარატი არ გამოიყენება. პრეპარატის არასაკმარისი ეფექტიანობის შემთხვევაში შეიძლება ხანმოკლე მკურნალობის გამოყენება (მაქსიმუმ 3 დღე) პრეპარატ ტრიფასი® 20-ის 8 მლ-მდე დოზის შეყვანით დღე-ღამეში (შეესაბამება 40 მგ ტორასემიდს). 

 

ფილტვების მწვავე შეშუპების შემთხვევაში მკურნალობის დაწყება საჭიროა პრეპარატ ტრიფასი® 20-ის 4 მლ დოზის (რაც შეესაბამება 20 მგ ტორასემიდს) ერთჯერადი ინტრავენური შეყვანით. მკურნალობის ეფექტიანობის მიხედვით, პრეპარატის აღნიშნული დოზის განმეორებით შეყვანა შეიძლება 30 წუთიანი ინტერვალით. დაუშვებელია მაქსიმალური დოზის გადაჭარბება, რომელიც შეადგენს პრეპარატ ტრიფასი® 20-ის 20 მლ-ს (რაც შეესაბამება 100 მგ ტორასემიდს) 24 საათის განმავლობაში. 

  

• პაციენტები ღვიძლის ფუნქციის დარღვევით

ღვიძლის ფუნქციის დარღვევისას მკურნალობის დროს საჭიროა სიფრთხილის დაცვა. ტორასემიდის კონცენტრაცია სისხლში შესაძლოა აიწიოს. 

 

• ხანდაზმული ასაკის პაციენტები

პრეპარატის დოზირების განსაკუთრებული მოთხოვნები ხანდაზმული ასაკის პაციენტებისთვის არ არის. 

 

გამოყენების წესი

ტრიფასი® 20 შეჰყავთ ინტრავენურად ნელა.

 

შეიყვანეთ მხოლოდ გამჭვირვალე ხსნარი!

 

ინტრაარტერიული შეყვანა მკაცრად აკრძალულია!

 

მიკრობიოლოგიური სისუფთავის გათვალისწინებით პრეპარატ ტრიფასი® 20-ის გამოყენება საჭიროა შეფუთვის პირველი გახსნისთანავე. თუ ის არ იყო დაუყოვნებლივ გამოყენებული, პრეპარატის შენახვის ხანგრძლივობასა და პირობებზე პასუხისმგებლობა ეკისრება მომხმარებელს. 

 

ტრიფასი® 20-ის გამოყენება არ შეიძლება სხვა სამკურნალო საშუალებებთან შერეული ინექციის ან ინფუზიის სახით.

 

• პრეპარატის მოხმარება

მითითება: ამპულები, რომლებსაც აქვთ გადატეხვის წერტილი, მოხმარებისას ქლიბის გამოყენებას არ საჭიროებს!

 

 

გამოყენების ხანგრძლივობა

თქვენმა მკურნალმა ექიმმა უნდა მიიღოს გადაწყვეტილება პრეპარატ ტრიფასი® 20-ის გამოყენების ხანგრძლივობის შესახებ. თუმცა, პრეპარატ ტრიფასი® 20-ის ინტრავენური შეყვანა არ უნდა გაგრძელდეს ერთ კვირაზე მეტხანს. 

მკურნალობის გაგრძელების შემთხვევაში რეკომენდებულია მისი შეცვლა ტაბლეტირებული ფორმით. 

 

პრეპარატ ტრიფასი® 20-ის გამოყენების პერიოდში თქვენ უნდა იმყოფებოდეთ მკაცრი სამედიცინო დაკვირვების ქვეშ. 

 

თუ თქვენ შეგიყვანეს პრეპარატ ტრიფასი® 20-ის საჭიროზე მეტი დოზა

პრეპარატ ტრიფასი® 20-ის დიდი რაოდენობით გამოყენებისას შესაძლებელია შემდეგი დარღვევები: 

• ორგანიზმიდან სითხისა და მარილების ჭარბი, შესაძლებელია საფრთხისშემცველი გამოყოფა

• ცნობიერების დარღვევა 

• ცნობიერების არევა

• არტერიული წნევის დაცემა

• მწვავე სისხლძარღვოვანი უკმარისობა

• დარღვევები საჭმლის მომნელებელი სისტემის მხრივ.

ამ შემთხვევაში დაუყოვნებლივ მიმართეთ მკურნალ ექიმს. ის მიიღებს ყველა საჭირო ზომას. 

 

თუ მოცემული პრეპარატის გამოყენებასთან დაკავშირებით დამატებითი კითხვები გაგიჩნდათ,    მიმართეთ ექიმს ან ფარმაცევტს.

 

4. შესაძლო გვერდითი მოქმედება

როგორც ყველა სამკურნალო საშუალებას, მოცემულ პრეპარატსაც შეუძლია გამოიწვიოს გვერდითი მოქმედება, თუმცა ის არ ვლინდება ყველა პაციენტში.  

 

ხშირად (შეიძლება აღენიშნოს 10-დან 1 პაციენტს)

• ორგანიზმის მჟავა-ტუტოვანი ბალანსის რეგულაციის დარღვევა (ეგრედ წოდებული მეტაბოლური ალკალოზი)

• კუნთების კრუნჩხვა (განსაკუთრებით, მკურნალობის დასაწყისში)

• სისხლში შარდმჟავას, გლუკოზისა და ლიპიდების (ტრიგლიცერიდებისა და ქოლესტერინის) კონცენტრაციის მომატება 

• კალიუმის დეფიციტი (ჰიპოკალიემია) კალიუმის შეზღუდული შემცველობის დიეტის, ღებინების, დიარეის, საფაღარათო საშუალებების ჭარბი გამოყენების, ღვიძლის ფუნქციის ქრონიკული დარღვევის ფონზე 

• დოზისა და მკურნალობის ხანგრძლივობის მიხედვით შეიძლება განვითარდეს წყალ-მარილოვანი ბალანსის დარღვევა, როგორიცაა სითხის დაკარგვა (ჰიპოვოლემია), კალიუმის ან/და ნატრიუმის დეფიციტი (ჰიპოკალიემია და ჰიპონატრიემია)

• დარღვევები საჭმლის მომნელებელი სისტემის მხრივ, მაგალითად, უმადობა, ტკივილი კუჭის არეში, გულისრევა და ღებინება, დიარეა, ყაბზობა, რომლებიც ყველაზე ხშირად აღინიშნება მკურნალობის დასაწყისში 

• სისხლში ღვიძლის გარკვეული ფერმენტების (გამა-გლუტამილტრანსფერაზას) კონცენტრაციების მომატება

• შეიძლება განვითარდეს თავის ტკივილი, თავბრუსხვევა, მომატებული დაღლილობა, სისუსტე (განსაკუთრებით, მკურნალობის დასაწყისში)

 

არახშირად (შეიძლება აღენიშნოს 100-დან 1 პაციენტს)

• სისხლში შარდოვანასა და კრეატინინის (კუნთოვანი ცილა) კონცენტრაციის მომატება

• შარდვის არსებული გაძნელების შემთხვევაში (მაგალითად, წინამდებარე ჯირკვლის გადიდებისას) შესაძლებელია შარდის შეკავება. ამ შემთხვევაში მნიშვნელოვნად უარესდება ან საერთოდ წყდება შარდის გამოყოფა. 

• პირის სიმშრალე

• კიდურების დაბუჟება ან გაცივება (პარესთეზია)

 

ძალიან იშვიათად (შეიძლება აღენიშნოს 10000-დან 1 პაციენტს)

• ერითროციტებისა და ლეიკოციტების (სისხლის წითელი და თეთრი უჯრედების) და თრომბოციტების (უჯრედები, რომლებიც პასუხს აგებს სისხლის შედედებაზე) რაოდენობის შემცირება.

• ალერგიული რეაქციები ქავილის, კანზე გამონაყარის (ეგზანთემა), სინათლის მიმართ მომატებული მგრძნობელობის (ფოტოსენსიბილიზაცია), კანის მხრივ მძიმე რეაქციების სახით 

• პრეპარატის ინტრავენური შეყვანისას არსებობს მომატებული მგრძნობელობის მწვავე რეაქციების განვითარების რისკი, რომლებიც შეიძლება საფრთხეს წარმოადგენდეს სიცოცხლისთვის

• სისხლძარღვებში სისხლის თრომბების წარმოქმნა (თრომბოემბოლური გართულებები)

• ცნობიერების არევა

• არტერიული წნევის დაქვეითება (ჰიპოტონია). 

• გულის კუნთსა და ტვინში სისხლის მიმოქცევის დარღვევა გულის რიტმის დარღვევების (არითმია), გულ-მკერდის არეში მოჭერის შეგრძნების (სტენოკარდია), გულის შეტევის, გონების მოულოდნელად დაკარგვის (გულის წასვლა) თანხლებით

• კუჭქვეშა ჯირკვლის ანთება (პანკრეატიტი)

• მხედველობის დარღვევა

• ხმაური ყურებში (ტინიტუსი)

• სმენის დაკარგვა

 

ზემოთ აღწერილი გვერდითი მოქმედების გამოვლენის შემთხვევაში დაუყოვნებლივ მიმართეთ მკურნალ ექიმს. მან უნდა შეაფასოს მათი სიმძიმე და მიიღოს გადაწყვეტილება შემდგომი ზომების მიღების აუცილებლობის შესახებ. 

მოულოდნელი ან ძალიან გამოხატული გვერდითი მოქმედების გამოვლენის შემთხვევაში დაუყოვნებლივ მიმართეთ მკურნალ ექიმს. ეს ძალიან მნიშვნელოვანია, რადგან ზოგიერთი გვერდითი მოქმედება შეიძლება საფრთხეს წარმოადგენდეს სიცოცხლისთვის. ექიმმა უნდა მიიღოს გადაწყვეტილება, შეიძლება თუ არა მკურნალობის გაგრძელება, ასევე მიიღოს საჭირო ზომები. 

მომატებული მგრძნობელობის რეაქციების პირველივე ნიშნების შემთხვევაში (მაგალითად, კანის მხრივ მძიმე რეაქციები) შეწყვიტეთ პრეპარატ ტრიფასი® 20-ის გამოყენება. 

 

ზომები, რომლებიც მიიღება მომატებული მგრძნობელობის რეაქციის შემთხვევაში

მკურნალობის დროს შესაძლებელია მომატებული მგრძნობელობის მწვავე რეაქციები (ანაფილაქსიური შოკი), რომლებიც საფრთხეს წარმოადგენს სიცოცხლისთვის და საჭიროებს საგანგებო ზომების მიღებას, როგორიცაა შოკის საწინააღმდეგო მდებარეობა (ზურგზე, ფეხების მაღლა მოთავსებით), სასუნთქი გზების გამტარობის უზრუნველყოფა, ჟანგბადის მიცემა და, საჭიროების შემთხვევაში, ფილტვების ხელოვნური ვენტილაცია, ვენაში წვდომის უზრუნველყოფა, ასევე ეპინეფრინის (ადრენალინის), კორტიკოიდების ინტრავენური შეყვანა და, შესაძლოა, სითხის დანაკარგის აღდგენა.  

 

შეტყობინება გვერდითი მოქმედების შესახებ

რომელიმე გვერდითი მოქმედების გამოვლენის შემთხვევაში მიმართეთ ექიმს ან ფარმაცევტს. ეს ეხება ნებისმიერ შესაძლო გვერდით მოქმედებას, მათ შორის ისეთებს, რომლებიც არ არის აღწერილი მოცემულ ჩანართში. გვერდითი მოქმედების შესახებ ინფორმაციის გაგზავნით თქვენ დაგვეხმარებით მოცემული სამკურნალო საშუალების უსაფრთხოების შესახებ მეტი ინფორმაციის მიღებაში. 

 

5. პრეპარატ ტრიფასი® 20-ის შენახვის პირობები

შეინახეთ ბავშვებისათვის მიუწვდომელ ადგილას. 

 

არ გამოიყენოთ მოცემული პრეპარატი ვარგისობის ვადის გასვლის შემდეგ, რომელიც მითითებულია ბლისტერსა და დასაკეც კოლოფზე. ვარგისობის ვადის გასვლის თარიღი გულისხმობს მითითებული თვის ბოლო დღეს.

 

ვარგისობის ვადა: 3 წელი.

 

შეინახეთ არაუმეტეს 25ºჩ ტემპერატურაზე. 

 

შეიძლება მხოლოდ გამჭვირვალე ხსნარის შეყვანა. 

შეფუთვის პირველად გახსნის შემდეგ საინექციო ხსნარი გამოიყენება დაუყოვნებლივ. ნარჩენი პრეპარატი უნდა გადააგდოთ. 

 

სამკურნალო საშუალებების კანალიზაციის მილში გადაგდება არ შეიძლება. პრეპარატის უტილიზაციის საკითხთან დაკავშირებით მიმართეთ ფარმაცევტს. აღნიშნული ზომები ხელს შეუწყობს გარემოს დაცვას.  

 

 

გაცემის წესი:

ფარმაცევტული პროდუქტის ჯგუფი  II ჯგუფი, გაიცემა ფორმა №3 რეცეპტით