ოჯახის ექიმი და ექთანი, რომელთა რეკომენდაციითაც 60 წელს ზემოთ მოქალაქეები აიცრებიან, დამატებით ანაზღაურებას მიიღებენ
ოჯახის ექიმი და ექთანი, რომელთა რეკომენდაციითაც 60 წელს ზემოთ მოქალაქეები აიცრებიან, დამატებით ანაზღაურებას მიიღებენ
თარიღი: 05/10/2021
აღნიშნულის შესახებ ჯანდაცვის მინისტრის პირველმა მოადგილემ თამარ გაბუნიამ საკოორდინაციო საბჭოს შემდგომ გამართულ ბრიფინგზე ისაუბრა.
წახალისების სქემა ოჯახის ექიმისა და ექთნის მიერ კონსულტაციის ჩატარებას და მოქალაქისთვის ვაქცინაციის უსაფრთხოების, საჭიროების, სიკეთეებისა და გვერდითი მოვლენების შესახებ საჭირო ინფორმაციის მიწოდებას ითვალისწინებს.
„60 წელს ზემოთ მოქალაქეების ვაქცინაცია განსაკუთრებით პრიორიტეტულია. ჩვენთვის დღეს კრიტიკულად მნიშვნელოვანია, ვაქცინაცია ჩაუტარდეს ყველა მოქალაქეს, რომელიც არის ამ ასაკობრივ ჯგუფში. აქ არის ყველაზე მაღალი გართულებები და არასასურველი გამოსავლების რისკი. ოჯახის ექიმი და ექთანი როგორც სოფლად, ასევე ქალაქში არის ყველაზე ახლოს ამ ჯგუფში შემავალ მოქალაქეებთან. მათ ნაწილს აქვს ქრონიკული დაავადება, ისინი ოჯახის ექიმებს იცნობენ. ამდენად, ჯანდაცვის სამინისტრო დღეს-ხვალ გამოუშვებს ახალ სქემას, რაც ითვალისწინებს ოჯახის ექიმების და ექთნების მეტად ჩართულობას ვაქცინაციის პროცესში და შედეგებზე ორიენტირებულ დაფინანსებას. ეს ნიშნავს, რომ როდესაც ოჯახის ექიმი იმუშავებს ამ ასაკობრივი ჯგუფის მოქალაქესთან და ის ამ მუშაობის შედეგად მიიღებს აცრის გადაწყვეტილებას, აიცრება, შესაბამისად მოხდება ოჯახის ექიმის და ექთნის ანაზღაურება, რათა მათ ჰქონდეთ მეტი სტიმული და მეტად აქტიურად შეძლონ უბანზე გასვლა. რა თქმა უნდა, ასევე გამოიყოფა ადმინისტრაციული რესურსი, რომე მეტად აქტიურად მოხდეს უბანზე მუშაობა. ვფიქრობთ, ეს დაგვეხმარება, რომ დაბალი ტემპი რაც გვაქვს 60 წელს ზემოთ ასაკობრივ ჯგუფში, დაიფაროს“, – განაცხადა თამარ გაბუნიამ.
ოჯახის ექიმებისა ექთნების წახალისების სქემის შესახებ დამატებითი დეტალები მიმდინარე კვირაში გახდება ცნობილი.