ატოპური მარშის პრევენციის აქტუალური საკითხები

24 თებერვალი, 2011

2011 წლის 24 თებერვალს ქ.თელავში, გოგებაშვილის სახელობის უნივერსიტეტში ჩატარდა სიმპოზიუმი თემაზე “ატოპური მარშის პრევენციის აქტუალური საკითხები” უნგრული ფარმაცევტული ქარხანა EGIS-ის და 'ალერგიისა და იმუნოლოგიის ცენტრის' მონაწილეობით.

“ეგისი” წარმოადგენს წამყვან ჯენერიული პრეპარატების საწარმოს უნგრეთში, აგრეთვე, ცენტრალურ და აღმოსავლეთ ევროპის ქვეყნებში. იგი დაარსდა 1913 წელს. დღეს “ეგისი” მძლავრი, თანამედროვე ფარმაცევტული კომპანიაა, რომლის ყველა ტექნოლოგიური ხაზი პასუხობს ევროპულ სტანდარტებს. “ეგისი” დაკავებულია არა მხოლოდ ჯენერიული პრეპარატების წარმოებით, არამედ დიდ ყურადრებას ანიჭებს ახალი, ორიგინალური წამლების შექმნას, ინოვაციური ტექნოლოგიების განვითარებას.

მრავალ ქვეყანაში, მათ შორის საქართველოშიც, “ეგისი” გახლავთ სამეცნიერო საზოგადოებების აქტიური პარტნიორი. “ეგისი” უწევს ორგანიზებას საგამანათლებლო პროგრამებს ექიმებისთვის, ატარებს სოციალურ პროგრამებს მოსახლეობისთვის. ეს საკითხები ფართოდ გააშუქა კომპანიის რეგიონალურმა მენეჯერმა ბ-ნ ალექსანდრე პაპუკაშვილმა.

ატოპური მარშის პრევენციის აქტუალურ საკითხებზე ისაუბრა 'ალერგიისა და იმუნოლოგიის ცენტრის' ხელმძღვანელმა ქ-მა მაია გოთუამ. მან აღნიშნა, რომ ალერგია 21 საუკუნის პანდემიად იქცა, იგი ცივილიზაციის დაავადებაა. ქ-ნი მაია შეეხო კვებითი ალერგიის საკითხებს, რასაც მიეძღვნა ვენეციაში ჩატარებული FAAM (Food Allergy and Anaphylaxis Meeting) ალერგოლოგების შეხვედრა. განხილული იყო ალერგიული პათოლოგიების მკურნალობის ბოლო ევროპული რეკომენდაციები, ანტიჰისტამინური პრეპარატების ადგილი თანამედროვე მკურნალობის სქემებში.

ახალი თაობის ანტიჰისტამინური პრეპარატები გამოირჩევიან მეტი სელექტიურობით, შესაბამისად - მეტი სიმძლავრით და გაზრდილი უსაფრთხოებით. მოხსენებაში წარმოდგენილი იყო ბოლო თაობის H1-ანტიჰისტამინური რეცეპტორების ბლოკატორის – ლევოცეტირიზინის ფარმაკოლოგიური და კლინიკური კვლევების მონაცემები, განხილული იყო ფართომასშტაბიანი 18 თვიანი კვლევა EPAAC - ის შედეგები ლევოცეტირიზინის ხანგრძლივად გამოყენების ეფექტურობა ზეატოპური დერმატიტის დროს. აგრეთვე ნაჩვენები იყო საქართველოში 'ალერგიისა და იმუნოლოგიის ცენტრში' ჩატარებული ღია კვლევის შედეგები პირველი ლევოცეტირიზინის - პოლეზინის გამოყენებით.

პოლეზინის ბიოექვივალენტობის კვლევა, მისი განმასხვავებელი ფარმაკოკინეტიკური პარამეტრები, დოზირების მოსახერხებელი რეჟიმი სამედიცინო საზოგადოებას გააცნო კომპანია “ეგის”-ის რეგიონალურმა მენეჯერმა ქ-მა ხათუნა დგებუაძემ.

პროგრამა

15:00 - 15:15
მონაწილეთა რეგისტრაცია

15:15 - 15:30
ეგისი - თანამედროვე მძლავრი უნგრული ფარმაცევტული საწარმო - ალექსანდრე პაპუკაშვილი, უნგრული ფარმაცევტული ქარხანა 'ეგისი' - ს რეგიონალური მენეჯერი

15:30 - 16:30
ატოპური მარშის პრევენციის აქტუალური საკითხები -მაია გოთუა, მედიცინის მეცნიერებათა დოქტორი, საქართველოს იმუნოლოგიისა და ალერგოლოგიის ცენტრის ხელმძღვანელი

16:30 - 16:40
პოლეზინი - მაქსიმალური დაცვა ალერგიის დროს -ხათუნა დგებუაძე, უნგრული ფარმაცევტული ქარხანა 'ეგისი' - ს რეგიონალური მენეჯერი

16:40
ფურშეტი

ქ.თელავი