ონივაიდი / Onivyde
- საერთაშორისო დასახელება (აქტიური ნივთიერება): irinotecan
- კლინიკურ-ფარმაკოლოგიური ჯგუფი: ონკოლოგია → სიმსივნის საწინააღმდეგო მოქმედების მქონე სხვა ჯგუფის საშუალებები
- მწარმოებელი კომპანია: Ipsen Pharma
- მწარმოებელი ქვეყანა: საფრანგეთი
- გამოშვების ფორმა: 4.3მგ/მლ 10მლ პეგილირებული ლიპოსომური კონცენტრატი ი.ვ. საინფუზიო ხსნარის მოსამზადებლად მინის ფლაკონი №1
- გაცემის რეჟიმი: II ჯგუფი (გაიცემა ფორმა N3 რეცეპტით)
1. რას წარმოადგენს პეგილირებული ლიპოსომური ონივაიდი და რისთვის გამოიყენება
რა არის პეგილირებული ლიპოსომური ონივაიდი და როგორ მოქმედებს იგი
პეგილირებული ლიპოსომური ონივაიდი არის კიბოს სამკურნალო საშუალება, რომელიც შეიცავს აქტიურ ნივთიერებას ირინოტეკანს. ეს აქტიური ნივთიერება შეყვანილია პატარა ლიპიდურ (ცხიმოვან) ნაწილაკებში, რომლებსაც ლიპოსომები ეწოდება.
ირინოტეკანი მიეკუთვნება კიბოს საწინააღმდეგო პრეპარატების ჯგუფს, რომელსაც ეწოდება "ტოპოიზომერაზას ინჰიბიტორები". ის ბლოკავს ფერმენტს, სახელწოდებით ტოპოიზომერაზა I, რომელიც მონაწილეობს უჯრედული დნმ-ის დაყოფაში. ეს ხელს უშლის კიბოს უჯრედების გამრავლებას და ზრდას და ისინი საბოლოოდ ნადგურდებიან.
მოსალოდნელია, რომ ლიპოსომები დაგროვდება სიმსივნეში და დროთა განმავლობაში ნელა გამოათავისუფლებს წამალს, რაც საშუალებას მისცემს მას იმოქმედოს უფრო ხანგრძლივად.
რისთვის გამოიყენება პეგილირებული ლიპოსომური ონივაიდი
პეგილირებული ლიპოსომური ონივაიდი გამოიყენება მოზრდილი პაციენტების სამკურნალოდ, რომლებსაც აქვთ კუჭქვეშა ჯირკვლის მეტასტაზური კიბო (კუჭქვეშა ჯირკვლის კიბო, რომელიც უკვე გავრცელდა სხეულის სხვა ნაწილებში), რომლებთანაც კიბოს მკურნალობა ადრე მოიცავდა პრეპარატს, სახელწოდებით გემციტაბინი. პეგილირებული ლიპოსომური ონივაიდი გამოიყენება კიბოს საწინააღმდეგო სხვა სამკურნალო საშუალებებთან ერთად, სახელწოდებით 5–ფტორურაცილი და ლეიკოვორინი.
თუ თქვენ გაქვთ რაიმე შეკითხვა იმის შესახებ, თუ როგორ მოქმედებს პეგილირებული ლიპოსომური ონივაიდი ან რატომ დაგინიშნეს ეს პრეპარატი, მიმართეთ თქვენს ექიმს.
2. რა უნდა იცოდეთ პეგილირებული ლიპოსომური ონივაიდის გამოყენებამდე
ყურადღებით მიჰყევით ექიმის მიერ გაცემულ ყველა ინსტრუქციას. ისინი შეიძლება განსხვავდებოდეს ამ ფურცელ–ჩანართში მოცემული ზოგადი ინფორმაციისგან.
არ გამოიყენოთ პეგილირებული ლიპოსომური ონივაიდი
- თუ ანამნეზში გქონდათ ძლიერი ალერგია ირინოტეკანზე ან ამ პრეპარატში შემავალ რომელიმე სხვა ინგრედიენტზე (ჩამოთვლილია ნაწილში 6).
- თუ ძუძუთი კვებავთ.
გაფრთხილებები და სიფრთხილის ზომები
გაესაუბრეთ თქვენს ექიმს ან ექთანს პეგილირებული ლიპოსომური ონივაიდის მიღებამდე
- თუ ოდესმე გქონიათ ღვიძლის პრობლემები ან სიყვითლე
- თუ ოდესმე გქონიათ ფილტვის დაავადება ან ადრე მიგიღიათ პრეპარატები (კოლონიის მასტიმულირებელი ფაქტორები), თქვენი სისხლის უჯრედების რაოდენობის გაზრდის მიზნით, ან სხივური თერაპია
- თუ იღებთ სხვა პრეპარატებს (იხილეთ ნაწილი „სხვა მედიკამენტები და პეგილირებული ლიპოსომური ონივაიდი“)
- თუ გეგმავთ ვაქცინაციას, რადგან ქიმიოთერაპიის დროს არ უნდა ჩატარდეს ბევრი აცრა
- თუ თქვენ იცავთ ნატრიუმის კონტროლირებად დიეტას, რადგან ეს პრეპარატი შეიცავს ნატრიუმს.
დაუყოვნებლივ მიმართეთ თქვენს ექიმს ან ექთანს პეგილირებული ლიპოსომური ონივაიდით მკურნალობის დროს
- თუ თქვენ გაქვთ უეცარი ქოშინი, წამოწითლება, თავის ტკივილი, გამონაყარი კანზე ან ჭინჭრის ციება (ქავილიანი გამონაყარი კანზე შეშუპებული წითელი მუწუკებით, რომლებიც მოულოდნელად ვითარდება), ქავილი, შეშუპება თვალების ირგვლივ, შებოჭილობა გულმკერდის ან ყელის არეში ინფუზიის დროს ან ხანმოკლედ მის შემდეგ
- თუ გაქვთ ცხელება, შემცივნება ან ინფექციის სხვა სიმპტომები
- თუ გაწუხებთ დიარეა ხშირი თხევადი განავლით და ვერ აკონტროლებთ მას მკურნალობიდან 12-24 საათის შემდეგ (იხ. ქვემოთ)
- თუ გაწუხებთ ქოშინი ან ხველა.
- თუ გაქვთ სისხლის შედედების ნიშნები ან სიმპტომები, როგორიცაა უეცარი ტკივილი და შეშუპება ფეხის ან ხელის არეში, ხველების უეცარი დაწყება, გულმკერდის ტკივილი ან სუნთქვის გაძნელება.
რა უნდა მოიმოქმედოთ დიარეის შემთხვევაში
როგორც კი გამოვლინდება პირველი თხევადი განავალი, დაიწყეთ რეჰიდრატაციის სითხეების დიდი მოცულობით დალევა (მაგ., წყალი, სოდიანი წყალი, გაზიანი სასმელები, წვნიანი), რათა თავიდან აიცილოთ ზედმეტად სითხისა და მარილების დაკარგვა თქვენი ორგანიზმიდან. დაუყონებლივ მიმართეთ ექიმს, რომ დაგინიშნოთ შესაბამისი მკურნალობა. ექიმმა შეიძლება დაგინიშნოთ პრეპარატი, რომელიც შეიცავს ლოპერამიდს, სახლის პირობებში მკურნალობის დასაწყებად, მაგრამ ის არ უნდა გამოიყენოთ ზედიზედ 48 საათზე ხანგრძლივი დროის განმავლობაში. თუ ნარჩუნდება თხევადი განავალი, მიმართეთ ექიმს.
სისხლის ანალიზები და სამედიცინო გამოკვლევები
სანამ დაიწყებთ მკურნალობას პეგილირებული ლიპოსომური ონივაიდით, თქვენი ექიმი ჩაატარებს სისხლის ანალიზს (ან სხვა სამედიცინო გამოკვლევებს) თქვენთვის საუკეთესო საწყისი დოზის დასადგენად. მკურნალობის დროს დაგჭირდებათ შემდგომი (სისხლის ან სხვა) ტესტების ჩატარება, რათა ექიმმა შეძლოს თქვენი სისხლის უჯრედების მონიტორინგი და შეაფასოს, თუ როგორ რეაგირებთ მკურნალობაზე. თქვენს ექიმს შეიძლება დასჭირდეს დოზის ან თქვენი მკურნალობის კორექტირება.
ბავშვები და მოზარდები
პეგილირებული ლიპოსომური ონივაიდის გამოყენება არ არის რეკომენდებული მოზარდებში და 18 წლამდე ასაკის ბავშვებში.
სხვა მედიკამენტები და პეგილირებული ლიპოსომური ონივაიდი
აცნობეთ თქვენს ექიმს, თუ იღებთ, ახლახანს მიიღეთ ან შესაძლოა მიიღოთ სხვა მედიკამენტები.
განსაკუთრებით მნიშვნელოვანია, აცნობოთ თქვენს ექიმს, თუ მიგიღიათ ადრე ირინოტეკანი რაიმე ფორმით.
პეგილირებული ლიპოსომური ონივაიდი არ უნდა იქნას გამოყენებული ირინოტეკანის შემცველი სხვა სამკურნალო საშუალებების ნაცვლად, რადგან ის განსხვავებულად მოქმედებს ლიპოსომების შემადგენლობაში ყოფნისას, ვიდრე თავისუფალი ფორმით შეყვანისას.
აცნობეთ თქვენს ექიმს, ფარმაცევტს ან ექთანს, თუ თქვენ უკვე იტარებთ ან ახლახან ჩაიტარეთ ქიმიოთერაპია და/ან რადიოთერაპია ან მკურნალობდით სოკოს საწინააღმდეგო მედიკამენტით ფლუციტოზინით.
ასევე განსაკუთრებით მნიშვნელოვანია, აცნობოთ ექიმს, თუ თქვენ იღებთ ასევე შემდეგ სამკურნალო საშუალებებს, რადგან ისინი ამცირებენ ირინოტეკანის დონეს თქვენს ორგანიზმში:
- ფენიტოინი, ფენობარბიტალი ან კარბამაზეპინი (პრეპარატები, რომლებიც გამოიყენება კრუნჩხვების და გულყრის სამკურნალოდ)
- რიფამპიცინი და რიფაბუტინი (ტუბერკულოზის სამკურნალო საშუალებები)
- კრაზანა (მცენარეული პრეპარატი, რომელიც გამოიყენება დეპრესიისა და გუნება–განწყობის დაქვეითების სამკურნალოდ)
განსაკუთრებით მნიშვნელოვანია აცნობოთ ექიმს, თუ თქვენ ასევე იღებთ შემდეგ მედიკამენტებს, რადგან ისინი ზრდის ირინოტეკანის დონეს თქვენს ორგანიზმში:
- კეტოკონაზოლი, იტრაკონაზოლი ან ვორიკონაზოლი (პრეპარატები, რომლებიც გამოიყენება სოკოვანი ინფექციების სამკურნალოდ)
- კლარითრომიცინი (ანტიბიოტიკი, რომელიც გამოიყენება ბაქტერიული ინფექციების სამკურნალოდ)
- ინდინავირი, ლოპინავირი, ნელფინავირი, რიტონავირი, საქვინავირი, ატაზანავირი (აივ ინფექციის საწინააღმდეგო პრეპარატები)
- რეგორაფენიბი (კიბოს გარკვეული ფორმების საწინააღმდეგო პრეპარატები)
- ტელაპრევირი (პრეპარატი, რომელიც გამოიყენება ღვიძლის დაავადების სამკურნალოდ, რომელსაც ეწოდება C ჰეპატიტი)
- ნეფაზოდონი (პრეპარატი, რომელიც გამოიყენება დეპრესიის, გუნება–განწყობის დაქვეითების სამკურნალოდ)
- გემფიბროზილი (პრეპარატი, რომელიც გამოიყენება სისხლში ცხიმის მაღალი დონის სამკურნალოდ)
პეგილირებული ლიპოსომური ონივაიდი საკვებთან და სასმელთან ერთად
მოერიდეთ გრეიფრუტის და გრეიფრუტის წვენის მიღებას პეგილირებული ლიპოსომური ონივაიდის მიღებისას, რადგან შეიძლება გაიზარდოს ირინოტეკანის დონე თქვენს ორგანიზმში.
ორსულობა და ძუძუთი კვება
თუ ორსულად ხართ, არ უნდა მიიღოთ პეგილირებული ლიპოსომური ონივაიდი, რადგან ამან შეიძლება ზიანი მიაყენოს ბავშვს. აცნობეთ ექიმს, თუ ხართ ან ფიქრობთ, რომ ორსულად ხართ. ჰკითხეთ ექიმს რჩევა, თუ გეგმავთ ბავშვის გაჩენას. თუ თქვენ იღებთ პეგილირებულ ლიპოსომურ ონივაიდს, თქვენ არ უნდა კვებოთ ძუძუთი ბოლო დოზის მიღების შემდეგ ერთი თვის განმავლობაში.
პეგილირებული ლიპოსომური ონივაიდით მკურნალობის დროს და შემდგომ ერთი თვის განმავლობაში თქვენ უნდა აირჩიოთ ჩასახვის საწინააღმდეგო ეფექტური მეთოდი, რომელიც თქვენთვის შესაფერისია ორსულობის თავიდან ასაცილებლად ამ პერიოდში. მამაკაცებმა უნდა გამოიყენონ პრეზერვატივი პეგილირებული ლიპოსომური ონივაიდით მკურნალობის დროს და შემდგომ 4 თვის განმავლობაში.
აცნობეთ ექიმს, თუ ძუძუთი კვებავთ. თქვენ არ უნდა მიიღოთ პეგილირებული ლიპოსომური ონივაიდი, თუ ძუძუთი კვებავთ, რადგან ეს შეიძლება საზიანო იყოს თქვენი ბავშვისთვის.
ავტომობილის მართვა და მექანიზმების გამოყენება
პეგილირებულმა ლიპოსომურმა ონივაიდმა შეიძლება გავლენა მოახდინოს თქვენს უნარზე მართოთ ავტომობილი და გამოიყენოთ მექანიზმები (რადგან შეიძლება გქონდეთ ძილიანობა, თავბრუსხვევა და დაღლილობა პეგილირებული ლიპოსომური ონივაიდის გამოყენებისას). თქვენ უნდა მოერიდოთ ავტომობილის მართვას, მექანიზმების გამოყენებას ან სხვა დავალებების შესრულებას, რომლებიც საჭიროებენ სრულ ყურადღებას, თუ გრძნობთ ძილიანობას, თავბრუსხვევას და დაღლილობას.
პეგილირებული ლიპოსომური ონივაიდი შეიცავს ნატრიუმს
ეს პრეპარატი შეიცავს 33,1 მგ ნატრიუმს (სამზარეულოს/სუფრის მარილის ძირითადი კომპონენტი) თითოეულ ფლაკონში. ეს მოზრდილებისთვის ნატრიუმის რეკომენდებული მაქსიმალური დღიური ნორმის მოხმარების 1,65%-ის ეკვივალენტურია.
3. როგორ გამოიყენება პეგილირებული ლიპოსომური ონივაიდი
პეგილირებული ლიპოსომური ონივაიდი უნდა დაინიშნოს მხოლოდ ჯანდაცვის სპეციალისტების მიერ, რომლებსაც გავლილი აქვთ სწავლება კიბოს საწინააღმდეგო მედიკამენტების დანიშვნის შესახებ.
ყურადღებით მიჰყევით ყველა ინსტრუქციას, რომელიც მიცემულია თქვენი ექიმის ან ექთნის მიერ.
თქვენი ექიმი მიიღებს გადაწყვეტილებას თქვენს მიერ მისაღები დოზების შესახებ.
პეგილირებული ლიპოსომური ონივაიდი შეჰყავთ წვეთოვანი (ინფუზიის) სახით ვენაში, რომელიც უნდა გაგრძელდეს სულ მცირე 90 წუთი და მიიღება ერთჯერადი დოზის სახით.
მას შემდეგ, რაც მიიღებთ პეგილირებულ ლიპოსომურ ონივაიდს, თქვენ მოგეცემათ ორი სხვა პრეპარატი, ლეიკოვორინი და 5–ფტორურაცილი.
მკურნალობა განმეორდება ყოველ ორ კვირაში.
ზოგიერთ შემთხვევაში შეიძლება საჭირო გახდეს უფრო დაბალი დოზები ან დოზირების უფრო გრძელი ინტერვალები.
შეიძლება ჩაიტაროთ პრემედიკაცია გულისრევისა და ღებინების საწინააღმდეგოდ. თუ თქვენ ადრე გქონდათ ოფლიანობა, სპაზმები მუცელში და ნერწყვდენა ხშირ და თხევად განავალთან ერთად პეგილირებული ლიპოსომური ონივაიდით მკურნალობისას, შეგიძლიათ მიიღოთ დამატებითი მედიკამენტები პეგილირებული ლიპოსომური ონივაიდის მიღებამდე, რათა თავიდან აიცილოთ ან შეამციროთ ეს მკურნალობის შემდგომ ციკლებში.
თუ თქვენ გაქვთ დამატებითი კითხვები ამ პრეპარატის გამოყენებასთან დაკავშირებით, მიმართეთ თქვენს ექიმს ან ექთანს.
4. შესაძლო გვერდითი ეფექტები
ყველა მედიკამენტის მსგავსად, ამ პრეპარატმაც შეიძლება გამოიწვიოს გვერდითი ეფექტები, თუმცა ისინი ყველასთან არ ვლინდება. მნიშვნელოვანია იცოდეთ, როგორი გვერდითი ეფექტები შეიძლება განვითარდეს.
თქვენმა ექიმმა შესაძლოა დაგინიშნოთ სხვა პრეპარატები თქვენი გვერდითი ეფექტების გასაკონტროლებლად
დაუყოვნებლივ აცნობეთ თქვენს ექიმს ან ექთანს რომელიმე შემდეგი სერიოზული გვერდითი ეფექტის შესახებ:
- თუ თქვენ გაქვთ კანის ქვეშ შეშუპება (ანგიოედემა) და/ან შესაძლო ანაფილაქსიური/ანაფილაქტოიდური რეაქციების სიმპტომები, როგორიცაა უეცარი ქოშინი, წამოწითლება, გულისრევა, თავის ტკივილი, გამონაყარი კანზე ან ჭინჭრის ციება (ქავილიანი გამონაყარი კანზე შეშუპებული წითელი მუწუკებით, რომლებიც მოულოდნელად ვითარდება), ქავილი, შეშუპება თვალების ირგვლივ, შებოჭილობა გულმკერდის ან ყელის არეში ინფუზიის დროს ან ცოტა ხნის შემდეგ. მძიმე ალერგიული რეაქციები შეიძლება სიცოცხლისთვის საშიში იყოს. შესაძლოა დაგჭირდეთ ინფუზიის შეწყვეტა და შეიძლება დაგჭირდეთ მკურნალობა ან დაკვირვება გვერდითი ეფექტების გამო.
- თუ გაქვთ ცხელება, შემცივნება და ინფექციის ნიშნები (რადგან შეიძლება საჭირო გახდეს დაუყოვნებელი მკურნალობა)
- თუ გაქვთ მძიმე მუდმივი დიარეა (თხევადი და ხშირი განავალი) - იხილეთ ნაწილი 2
შეიძლება გამოვლინდეს შემდეგი სხვა გვერდითი ეფექტები:
ძალიან ხშირი (შეიძლება განვითარდეს 10-დან 1-ზე მეტ ადამიანთან)
- სისხლის თეთრი უჯრედების დაბალი დონე (ნეიტროპენია და ლეიკოპენია), სისხლის წითელი უჯრედების დაბალი დონე (ანემია)
- სისხლში თრომბოციტების დაბალი დონე (თრომბოციტოპენია)
- დიარეა (თხელი ან წყლიანი და ხშირი განავალი)
- გულისრევა და ღებინება
- ტკივილი კუჭის ან ნაწლავის მიდამოში
- მტკივნეული პირის ღრუ
- წონის დაკლება
- მადის დაკარგვა
- სხეულის სითხის დაკარგვა (დეჰიდრატაცია)
- ორგანიზმში მარილების (ელექტროლიტების) დაბალი დონე (მაგ., კალიუმი, მაგნიუმი)
- უჩვეულო თმის ცვენა
- დაღლილობა
- თავბრუსხვევა
- შეშუპება და სითხის შეკავება რბილ ქსოვილებში (პერიფერიული შეშუპება)
- საჭმლის მომნელებელი ტრაქტის ლორწოვანი გარსის ტკივილი და შეშუპება (ლორწოვანი გარსის ანთება)
- ცხელება
- ზოგადი სისუსტე
ხშირი (შეიძლება განვითარდეს 10-დან 1-მდე ადამიანთან)
- შემცივნება
- -ინფექციები, მაგალითად სოკოვანი ინფექციები პირის ღრუში (ორალური კანდიდოზი), ცხელება სისხლის თეთრი უჯრედების დაბალი შემცველობით (ფებრილური ნეიტროპენია), ინფექციები, რომლებიც დაკავშირებულია პრეპარატის ვენაში შეყვანასთან.
- კუჭისა და ნაწლავების ანთება (გასტროენტერიტი)
- სხეულის სისტემური ანთება, გამოწვეული ინფექციით (სეფსისი)
- მთელი სხეულის ანთების პოტენციურად სიცოცხლისათვის საშიში გართულება (სეპტიური შოკი)
- ფილტვების ინფექცია (პნევმონია)
- სისხლის თეთრი უჯრედების ქვეტიპის დაბალი დონე, რომელსაც ეწოდება ლიმფოციტები, მნიშვნელოვანი ფუნქციით იმუნური სისტემისთვის (ლიმფოპენია)
- ორგანიზმში ზოგიერთი მარილის (ელექტროლიტების) დაქვეითება (მაგ., ფოსფატი, ნატრიუმი)
- სისხლში შაქრის დაბალი დონე (ჰიპოგლიკემია)
- უძილობა
- ცუდი გემო პირში
- სინდრომი, რომელსაც ეწოდება ქოლინერგული სინდრომი, ოფლიანობით, ნერწყვდენით და სპაზმებით მუცელში.
- დაბალი არტერიული წნევა (ჰიპოტენზია)
- ღრმა ვენაში სისხლის კოლტის წარმოქმნა (ღრმა ვენის თრომბოზი) ან ფილტვის მთავარი არტერიის ან მისი ერთ-ერთი ტოტის ბლოკირება (ფილტვის ემბოლია) ან სისხლის ნაკადის სხვა ადგილის ბლოკირება თრომბის გამო (ემბოლია)
- ხმის დარღვევა, ხრინწიანი ან ძალიან ხრინწიანი ხმა
- ჰაერის უკმარისობა
- ნაწლავის ანთება
- ბუასილი (ჰემოროიდები)
- ღვიძლის ფერმენტების (ალანინამინოტრანსფერაზა ან ასპარტატამინოტრანსფერაზა) მატება სისხლის ლაბორატორიულ ანალიზებში
- ბილირუბინის დონის მატება (მოყვითალო-ნარინჯისფერი პიგმენტი, სისხლის წითელი უჯრედების ნორმალური დაშლის ნარჩენი პროდუქტი) ღვიძლის ფუნქციასთან დაკავშირებულ სხვა ლაბორატორიულ მაჩვენებლებში.
- სისხლის შედედების სისტემის ფუნქციასთან დაკავშირებული სხვა ლაბორატორიული მაჩვენებლების (საერთაშორისო ნორმალიზებული თანაფარდობის მომატება) ზრდა.
- სისხლში ალბუმინის (ძირითადი ცილა ორგანიზმში) არანორმალურად დაბალი დონე
- ქავილი
- თირკმლის ფუნქციის უეცარი პრობლემები, რამაც შეიძლება გამოიწვიოს თირკმლების ფუნქციის სწრაფი გაუარესება ან დაკარგვა
- პათოლოგიური რეაქცია ინფუზიაზე, რომელიც იწვევს ისეთ სიმპტომებს, როგორიცაა ქოშინი, წამოწითლება, თავის ტკივილი, შებოჭილობა გულმკერდის ან ყელის არეში
- ორგანიზმში სითხის პათოლოგიური შეკავება, რაც იწვევს დაზიანებულ ქსოვილებში შეშუპებას (შეშუპება)
არახშირი (შეიძლება განვითარდეს 100-დან 1 ადამიანთან)
- სხეულის სისტემური ანთება, გამოწვეული ნაღვლის ბუშტისა და სანაღვლე გზების ინფექციით (ბილიარული სეფსისი)
- ალერგიული რეაქცია პეგილირებულ ლიპოსომურ ონივაიდზე (აქტიური ნივთიერება ან დამხმარე ნივთიერებები)
- სხეულის ქსოვილებში ჟანგბადის მიწოდების დაქვეითება
- საყლაპავის (საკვების მილის) ანთება
- თრომბის წარმოქმნა ან არსებობა სისხლძარღვში - ვენაში ან არტერიაში (თრომბოზი)
- სწორი ნაწლავის ლორწოვანი გარსის ანთება (მსხვილი ნაწლავის ბოლო ნაწილი)
- ჭინჭრის ციება (შეშუპებული წითელი მუწუკები)
- გამონაყარი კანზე
- გამონაყარის ტიპი, რომელიც ხასიათდება კანზე ბრტყელი, წითელი უბნის განვითარებით, დაფარული მუწუკებით (მაკულო-პაპულური გამონაყარი)
- ფრჩხილის ფირფიტების ფერის შეცვლა
უცნობია (სიხშირის დადგენა შეუძლებელია არსებული მონაცემების მიხედვით)
- კანის გაწითლება
შეტყობინება გვერდითი ეფექტების შესახებ
თუ თქვენ გაქვთ რაიმე გვერდითი მოვლენა, მიმართეთ თქვენს ექიმს ან ექთანს. ეს მოიცავს ნებისმიერ შესაძლო გვერდით ეფექტს, რომელიც არ არის ჩამოთვლილი ამ ფურცელ-ჩანართში. გვერდითი ეფექტების შეტყობინებით თქვენ შეგიძლიათ მიაწოდოთ მეტი ინფორმაცია ამ პრეპარატის უსაფრთხოების შესახებ.
5. როგორ ინახება პეგილირებული ლიპოსომური ონივაიდი
შეინახეთ ეს პრეპარატი ბავშვებისთვის უხილავ და მიუწვდომელ ადგილას.
არ გამოიყენოთ ეს პრეპარატი ვარგისობის ვადის გასვლის შემდეგ, რომელიც მითითებულია მუყაოს კოლოფზე და ფლაკონზე „EXP“-ის შემდეგ. ვარგისობის ვადა ეხება იმ თვის ბოლო დღეს.
ინახება მაცივარში (2°C - 8°C).
არ შეიძლება გაყინვა.
შეინახეთ ფლაკონი მუყაოს კოლოფში სინათლისგან დასაცავად.
საინფუზიო კონცენტრატის განზავების შემდეგ 5% გლუკოზის საინექციო ხსნარით ან ნატრიუმის ქლორიდის 9 მგ/მლ (0.9%) საინექციო ხსნარით, დისპერსია უნდა იქნას გამოყენებული რაც შეიძლება მალე, მაგრამ შეიძლება ინახებოდეს გარემოს ტემპერატურაზე (15°C-დან 25°C-მდე) 6 საათამდე. საინფუზიოდ განზავებული დისპერსია შეიძლება შეინახოს მაცივარში (2°C - 8°C) გამოყენებამდე არაუმეტეს 24 საათის განმავლობაში. ის დაცული უნდა იყოს სინათლისგან და არ უნდა გაიყინოს.
არ გადააგდოთ ეს პრეპარატი კანალიზაციაში ან საყოფაცხოვრებო ნაგავში. ჰკითხეთ თქვენს ფარმაცევტს, როგორ გადააგდოთ წამლები, რომლებსაც აღარ იყენებთ. ეს ზომები ხელს შეუწყობს გარემოს დაცვას.
6. შეფუთვის შემადგენლობა და სხვა ინფორმაცია
რას შეიცავს პეგილირებული ლიპოსომური ონივაიდი
- აქტიური ნივთიერებაა ირინოტეკანი. კონცენტრატის ერთი 10 მლ ფლაკონი შეიცავს 43 მგ ირინოტეკანის უწყლო თავისუფალ ფუძეს (როგორც სუკროზოფატის მარილი პეგილირებულ ლიპოსომურ ფორმაში).
- სხვა ინგრედიენტებია: 1,2 დისტეაროილ-სნ-გლიცერო-3-ფოსფოქოლინი (DSPC); ქოლესტერინი, N-(კარბონილის მეთოქსიპოლიეთილენგლიკოლი 2000)-1,2 დისტეაროლი-სნ-გლიცერო-3-ფოსფოეთანოლამინი (MPEG-2000-DSPE); საქაროზას ოქტასულფატი; 2 [4-(2-ჰიდროქსიეთილ)პიპერაზინი-1-ილ]ეთანსულფონის მჟავა (HEPES ბუფერი); ნატრიუმის ქლორიდი და საინექციო წყალი. პეგილირებული ლიპოსომური ონივაიდი შეიცავს ნატრიუმს, თუ თქვენ იცავთ ნატრიუმის კონტროლირებად დიეტას, იხილეთ ნაწილი 2.
როგორ გამოიყურება პეგილირებული ლიპოსომური ონივაიდი და შეფუთვის შიგთავს
პეგილირებული ლიპოსომური ონივაიდი წარმოდგენილია მინის ფლაკონში თეთრიდან ოდნავ მოყვითალო გაუმჭვირვალე იზოტონური ლიპოსომური დისპერსიის სახით.
თითოეული შეფუთვა შეიცავს ერთ ფლაკონს 10 მლ კონცენტრატით.
სად შევიძინოთ?