რატომ უნდა კვებო ძუძუთი შენი პატარა და როგორ წარმოიქმნება რძე

თარიღი: 10 თებერვალი, 2020

რატომ უნდა კვებო ძუძუთი შენი პატარა და როგორ წარმოიქმნება რძე

9 თვის მანძილზე დედის წიაღში მყოფი პატარა ადამიანი 9 თვის მანძილზე დაცული და უზრუნველი ცხოვრბით ცხოვრობდა.
ჭიპლარი, რომელიც მას შენთან აკავშირებდა, მშობიარობის შემდეგ გადაიჭრა და ახალშობილმა დედასთან ფიზიკური კავშირი დაკარგა. მაგრამ მას შენი ხმა, გულისცემა, სუნი ახსოვს და ამ კავშირის გაგრძელებას ითხოვს!
ამ კავშირის საუკეთესო გაგრძელება კი სწორედ ძუძუთი კვებაა!
ბავშვისათვის დედის რძე საუკეთესო საკვებია, რომლის შემადგენლობა მუდმივად იცვლება მის ზრდასთან ერთად. ეს ნიშნავს, რომ ქალის რძე ცოცხალი ნივთიერება და სრულადაა მორგებული შენი პატარას მოთხოვნილებებს.
ის შეიცავს ყველა იმ საჭირო ინგრდიენტს, რომელიც საჭიროა მისი ფიზიკური და გონებრივი ზრდა-განვითარებისათვის.
ქალის რძე შეიცავს მზა ანტისხეულებს, რომლებიც პატარას სხვადასხვა ინფექციისაგან იცავს, ანტისხეულებით განსაკუთრებით მდიდარია ხსენი, რომელიც მშობიარობის შემდეგ პირველ დღეებში წარმოიქმნება. მისი მიღება აუცილებელია.
და იცი რატომ? ხსენი მარტო საკვები კი არა, პრაქტიკულად ახალშობილის პირველი იმუნიზაციიაა.
დედის რძე ფერმენტებსაც შეიცავს, ისინი ახალშობილის უმწიფარ კუჭ-ნაწლავს მიღებული საკვების თვითმონელებაში ეხმარებიან.
ძუძუთი კვება მოსახერხებელი და კომფორტულია - შენ არ დაგჭირდება დამატებითი შრომა და საკვების მომზადება. მზა თბილი და სტერილური საკვები მზადაა ყოველთვის, როცა შენს პატარა შვილიკოს შია.
კიდევ ერთი - ძუძუთი კვება მომავალში ძუძუს ავთვისებიანი დაავადებებისაგან დაგიცავს. მშობიარობის შემდეგ კი საშვილოსნოს დროულ შეკუმშვას შეუწყობს ხელს და მშბიარობისშემდეგომი სისხლდენის რისკს შეამცირებს.
შემდეგი რჩევა კი შენი ოჯახის წევრებს გამოადგებათ - ხელი შეუწყეთ ახალგაზრდა დედიკოს, რომ ძუძუთი კვებოს პატარა. იზრუნეთ მის სრულფასოვან კვებაზე და დასვენების რეჟიმზე.
გარდა იმისა, რომ ეს დედა-შვილს მოუტანს დიდ სარგებელს, თქვენი ოჯახის ბიუჯეტსაც გაუფთხილდება - ხელოვნური საკვები ხომ სულაც არაა იაფი!

როგორ წარმოიქმნება რძე

რძის წარმოქმნა ქალის ორგანიზმში წარმოქმნილი ჰორმონებით - პროლაქტინით და ოქსიტოცინით იმართება. მათი წარმოქმნა ძლიერდება ძუძუთი კვების დროს. ეს ნიშნავს, რომ რაც უფრო ხშირად აწოვებ ჩვილს ძუძუს, რაც ხშირად გაღიზიანდება ძუძუს თავი, რაც უფრო მეტად დაცლი სარძევე ჯირკვალს, მით მეტი რძე გექნება!
ანუ წარმატებული ძუძუთი კვების საიდუმლო ხშირ ძუძუთი კვებაშია.
არის თუ არა რძის რაოდენობა დამოკიდებული ძუძუს ზომებსა და ფორმებზე? სულაც არა! თუ შენ პატარა სარძევე ჯირკვალი გაქვს, ეს არ იქნება ძუძუთი კვების დაბრკოლება.
ძუძუთი წარმატებულ კვებას ხელს უწყობს დედის სიმშვიდე, ოჯახის წევრთა მხადაჭერა.
მნშვნელოვანია მეძუძური ქალის განწყობა და რწმენა - აუცილებლად შესძლებ ძუძუთი კვებას, აქ საშიში და საორჭოფო არაფერია. შეეცადე და უკუაგდე მთავარი ეჭვი - რძე რომ არ მქონდეს? რომ ვერ შევძლო?

გახსოვდეს, ჰიპოგალაქტია ანუ რძის ჭეშმარიტი სიმცირე იშვიათი მოვლენაა! მთვარია სწორად კვებო პატარა ძუძუთი.

სტატიის ავტორი: “ავერსის კლინიკის” პედიატრიული სამსახურის უფროსი, აკადემიური დოქტორი მედიცინაში თამარ ობგაიძე